Oborri i Jobesimtarëve: Në Berlin tema e lirisë përballë Hyjit
Përvoja e lirisë, me Hyjin e pa Hyjin. Kjo është tema e etapës gjermane të Oborrit
të Jobesimtarëve, strukturë e Këshillit Papnor për Kulturën, që ka si synim dialogun
me kë nuk i përket asnjë besimi fetar. Pas Parisit, Stokholmit dhe Barcelonës,
e ka radhën një tjetër qytet në përballje me shekullarizimin: Berlini. Besimtarë e
jobesimtarë do të dialogojnë mbi temën e lirisë, në metropolin që lirinë e ka përjetuar
në mënyrë të veçantë qysh para rënies së murit dhe revolucinit të 1989, siç u shpreh
Imz. Zollitsch (Coliç): “Bëhet fjalë për thellësinë e humanizmit etik”. Kryetari
i ipeshkvinjve gjermanë radhiti tematikat rreth të cilave do të shtjellohet dialogu:
humanizmi etik, madhështia e fesë në Hyjin, liria e artit dhe e së bukurës, hiri dhe
dinjiteti i natyrës njerëzore dhe i devocionit. Pyetjes a është Hyji themeli dhe
caku i lirisë njerëzore apo armiku dhe kundërshtari i saj më i madh, iu përgjigj: “Ka
shumë kohë që ateistët dhe besimtarët nuk gjenden më në llogore të kundërta. Tani
çështja është të mos tregohen më gjëra të pavërteta për njëri-tjetrin, të kuptohen
më mirë jetët e të tjerëve, gjestet dhe realizimet e lirive të tyre. Në spitalin
“La Charité”, ndër më të njohurit në Evropë, do të shqyrtohet marrëdhënia e shkencës
me etikën. Edhe këtu shtrohet një pyetje: a është njeriu krijesë krijuese e Hyjit,
apo shestues i vetvetes? Pastaj, në Deutsches Theater të Berlinit, do të shqyrtohet
marrëdhënia e fesë me artin dhe feja në skenë, ndërmjet respektit, blasfemisë dhe
lirisë artistike. Në Bode Museum dialogu ndërmjet besimtarëve e jobesimtarëve do
të shfaqet simbolikisht me anë të procesionit të të rinjve, që do të takohen në një
pikë të përbashkët. Imz. Zollitsch e ka përmbledhur me këto fjalë qëllimin e Oborrit: “Oborri
i jobesimtarëve” ka si qëllim të vërë në dukje pasurinë dhe thellësinë e fesë katolike,
të shprehë vlerësimin për qëndrimet e jobesimtarëve, por edhe të shohë tek feja gjurmët
e mosbesimit.” Pas Berlinit, në prill, e kanë radhën Republika Çeke dhe Washingtoni.
Më vonë, në Romë, do të flitet për solidaritetin sipas etikës laike dhe fetare. I
pyetur rreth ”Oborrit të jobesimtarëve”, pas të cilit u zhvillua intervista e Papa
Françeskut me Eugenio Scalfar-in, drejtori i Sallës së Shtypit të Vatikanit Atë Federico
Lombardi u përgjigj: “Siç e ka thënë vetë Scalfari, përmbajtja e dialogut është miratuar
dhe, për këtë arsye, është besnike”.