Janë rreth katër milion shtegtarët, që çdo vit shkojnë në Kapelën e Dukjeve të Zojës,
në qendër të Shenjtërores së Fatimës, për të nderuar shtatoren prej druri të Virgjërës
Shenjte, e cila iu duk në vitin 1917, tre barinjve: Luçisë, Françeskut dhe Xhaçintës.
Ndër ta, edhe tre papë: i pari qe Pali VI, në vitin 1967, i ndjekur nga i Lumi Gjon
Pali II, i cili e vizitoi shenjtëroren tri herë, duke vendosur në kurorën e shtatores
plumbin e atentatit kundër tij më 13 maj 1981, si shenjë falenderimi për Zojën, që
i shpëtoi jetën. Papa i fundit që shkoi në Fatima, është Benedikti XVI, para tri vjetësh.
Që nga vendosja, në vitin 1920, shtatorja rreth njëmetërshe e Zojës, realizuar nga
skulptori José Ferreira Thedim, ka dalë nëntë herë nga shenjtërorja, ndërmjet viteve
1945 e 2005. Kanë qenë raste tejet të veçanta, siç është ai i Ditës mariane, organizuar
më 12 e 13 tetor nga Këshilli Papnor për Nxitjen e Ungjillëzimit të Ri, në kuadrin
e Vitit të Fesë e në përkim me përvjetorin e dukjes së fundit të Zojës së Fatimës,
më 13 tetor 1917. Shumë më të shpeshta kanë qenë udhëtimet e së ashtuquajturës “Virgjër
shtegtare” e Fatimës, realizuar sipas këshillave të motër Luçisë e kurorëzuar solemnisht
nga kryeipeshkvi i atëhershëm i Evoras, imzot Emanuele Mendes da Conceição Santos,
më 13 maj 1947. Gjatë këtyre dhjetëvjeçarëve, ajo ka përshkuar botën mbarë.