Ըստ «Էլ Փայիս»-ի. վերջին ամիսներուն աշխարհը փոխած վեց նորութիւններ:
Սպանական «Էլ Փայիս» օրաթերթը փորձած է յստակացնել, թէ Երկիր մոլորակին վրայ ի՛նչ հետաքրքրական
բաներ տեղի ունեցած են յուլիս ամսուընէ սկսեալ. կը նշուին վեց նորութիւններ, որոնք, օրաթերթին
կարծիքով, աշխարհի վրայ շատ բան փոխած են: 1.- Սուրիոյ մէջ քիմիական զէնքի գործածութիւնը Յատկանշական
է, որ Միացեալ Նահանգներու նախագահ Պարաք Օպամա չկրցաւ միջամտել, փոխարէնը այդ մէկը ըրաւ
Փութինը: 2.- Փութինի վերածնունդը Նախապէս Փութինի միջազգային հեղինակութիւնը կը
տկարանար: Սակայն Սուրիոյ շուրջ ծաւալող դէպքերը Փութինի համար կարելիութիւն ստեղծեցին,
իսկ ան կարողացաւ օգտուիլ անկէ: Ըստ հեղինակին, Փութին «արիւնարբու վարչակարգը պաշտպանող
բռնատէրէն» փոխակերպուեցաւ պատերազմը կանխարգիլող ղեկավարի: 3.- Մուրսիի հեռանալը Հեղինակը
կը նշէ, որ ժամանակակից աշխարհին մէջ դիւրին է իշխանութեան հասնիլ, սակայն դժուար է զայն
պահելը, իսկ կորսնցնելը աւելի դիւրին է: 4.- Ռուհանիի յայտնուիլը Հեղինակը Իրանի
նախագահ Հասան Ռուհանիի իրանեան նախագահական ընտրութեան արձանագրած յաղթանակը եւ Իրան-Միացեալ
Նահանգներ յարաբերութիւններուն մէջ «ձիւնհալը» կը բացատրէ այն բանով, որ միջազգային պատժամիջոցները
ազդած են իրանցիներուն վրայ: 5.- Ամերիկեան «Թէյի» շարժումի հզօրութիւնը «Թէյի»
կուսակցութիւնը փաստացիօրէն կանգնեցուցած է Միացեալ Նահանգներու աշխատանքները, ինչ որ
համաշխարհային նոր ճգնաժամի կրնայ յանգեցնել: 6.- Քարիւղի եւ կազի արտահանման մէջ
Միացեալ Նահանգներու աշխարհի մէջ առաջին դիրքը գրաւելու իրողութիւնը: «Ասիկա պիտի փոխէ
աշխարհը», կը գրէ հեղինակը: