Пій ХІІ і беларусы: у 55-ю гадавіну смерці Пантыфіка
55 гадоў таму, 9 кастрычніка
1958 г., памёр папа Пій ХІІ – мужны і дбайны пастыр, якому было даверана весці лодку
Хрыста праз бурныя хвалі сярэдзіны ХХ ст. Навіна аб смерці Пантыфіка знайшла месца
на старонках часопіса “Зніч”, які з 1950 па 1975 г. выдаваў у Рыме беларускі святар
і першы кіраўнік Беларускай рэдакцыі Ватыканскага радыё кс. Пётр Татарыновіч. На яго
старонках святар адзначаў, што ў “айцоўскім сэрцы” Пія ХІІ “знайшлося месца для беларусаў”.
У 1949 г. гэты Пантыфік удзяліў благаслаўленне ўсяму беларускаму народу у якасці падзякі
за віншаванне з нагоды 50-годдзя яго святарства, скіраванае адным з прадстаўнікоў
беларускай каталіцкай эміграцыі.
Варта адзначыць, што ў 1946 г. Пій ХІІ прыняў
на аўдыенцыі чатырох беларускіх рэлігійных і грамадскіх дзеячаў: кс. Пятра Татарыновіча,
а. Льва Гарошку, а. Чэслава Сіповіча і старшыню “Сусветнага аб’яднання беларускай
эміграцыі” Лявона Рыдлеўскага. Папа адгукнуўся на зварот беларускіх дзеячаў аб неабходнасці
прызначэння Апостальскага візітатара для беларусаў замежжа, а таксама падтрымцы душпастрыства
беларускіх вернікаў за мяжой.
Менавіта падчас пантыфікату Пія ХІІ з боку Апостальскай
Сталіцы пачала аказвацца пастаянная дапамога беларускім душпастрыскім цэнтрам у Вялікабрытаніі,
Францыі, Бельгіі і Германіі. Падтрымлівалася выданне малітоўнікаў, Евангелля і каталіцкага
перыядычнага друку. Пій ХІІ памятаў пра неабходнасць нясення евангельскага паслання
людзям, якія апынуліся за жалезнай завесай таталітарных рэжымаў. Ён быў першым Папам,
чыё слова загучала на радыёхвалях па-беларуску. Менавіта ў гады яго пантыфікату ўзнікла
Беларуская рэдакцыя Ватыканскага радыё.
Кс. Татарыновіч адзначаў, што ўзгаданыя
факты пацвярджаюць не апошняе месца беларускага народа ў сэрцы гэтага Пантыфіка.“Хайжа
і наша пабожна-удзячная памяць аб ім ня будзе апошняй”, - заклікаў святар у 1958 г.