2013-10-08 10:09:18

Հաւատոյ Տարի - 12 եւ 13 Հոկտեմբերին ''Մարեմեան Օրեր'' Վատիկանի Մէջ։


''Երանի քեզի որ հաւատացիր'' խորագիր կրող ''Մարեմեան Օրեր'' ձեռնարկը տեղի կ՛ունենայ յառաջիկայ 12 եւ 13 հոկտեմբերին Վատիկանի մէջ։
Վերոյիշեալ ''օրերը'' կազմակերպուած են Նոր Աւետարանութեան Քահանայապետական Խորհուրդի ջանքով ` եւ կը զուգադիպին Ֆադիմայի Տիրամօր վերջին երեւումին տարեդարձին`13 հոկտեմբեր 1917։ Այս առթիւ Փորդուկալի Սրբավայրի`Տիրամօր արձանը ժամանակաւոր կերպով պիտի փոխադրուի Վատիկանի Սուրբ Պետրոսի հրապարակ` հաւատացեալներու պաշտամունքին արժանանալու համար ։

''Մարեմեան Օրեր''ը սկիզբ կ՛առնեն շաբաթ 12 հոկտեմբերի առաւօտեան Սուրբ Պետրոս առաքելապետի դամբանին կազմակերպուած ուխտագնացութեամբ, որմէ ետք նախատեսուած է Սուրբ Հաղորդութեան պաշտամունք եւ ապաշխարութեան խորհուրդի մատակարարում։ Երեկոյեան ժամը 5-ին Ֆրանչիսկոս Սրբազան քահանայապետի Ներկայութեամբ` Ֆադիմայի Տիրամօր Արձանը կը ժամանէ Սուրբ Պետրոսի հրապարակ ուր նախատեսուած է Թափօր մը ու ապա Մարեմեան Աղօթք, հուսկ Սրբազան Քահանայապետի խորհրդածութիւնն ու եզրափակիչ առաքելական օրհնութիւնը։

Կիրակի, 13 հոկտեմբերի առաւօտեան Սուրբ Պետրոսի հրապարակի վրայ նախատեսուած է Ֆրանչիսկոս Քահանայապետի նախագահութեամաբ հանդիսաւոր Սուրբ Պատարագ ու ապա նոյն վայրէն Նորին Սրբութիւնը կ՛արտասանէ Հրեշտակ Տեառն Մարեմեան Աղօթքը։ Սուրբ Պատարագի աւարտին նախատեսուած է նաեւ Սրբազան Քահանայապետի ''Տիրամօր Յանձնումի'' աղօթքը։







All the contents on this site are copyrighted ©.