Papa cakton datat e Sinodit të ri të Ipeshkvijve mbi temën e familjes

Papa Françesku caktoi sot datat e Asamblesë së tretë të përgjithshme të jashtëzakonshme të Sinodit të Ipeshkvijve: do të mbahet në Vatikan, nga 5 deri më 19 tetor 2014 dhe do të ketë për temë “Sfidat baritore të familjes në kuadrin e ungjillëzimit”.
Ky vendim u mor pas mbledhjes së pestë të Këshillit të 13-të të zakonshëm të sekretarisë së Sinodit të Ipeshkvijve, që përfundoi sot në Vatikan. Në sesionin e pasdites së djeshme mori pjesë edhe Papa Françesku, në vazhdën e impenjimit për reforma në gjirin e Kishës Katolike, ndër të cilat, riorganizimi i Sinodit si organ këshillimor për Atin e Shenjtë zë një ndër vendet kryesore.
Drejtori i Sallës së Shtypit të Selisë së Shenjtë, atë Federiko Lombardi deklaroi se ky Sinod i jashtëzakonshëm për temën e familjes është mënyra me të cilën Papa dëshiron të reflektojë për udhën e Kishës, duke bashkëpunuar me ipeshkvijtë e të gjithë botës. Prandaj, propozimi i zgjidhjeve baritore nga ana e personave, apo zyrave lokale mund të krijojë konfuzion, nënvizon atë Lombardi. Duhet vënë në dukje rëndësia për të ecur përpara në bashkim të plotë me krejt Kishën.