Në Nish të Serbisë, ortodoksët kremtojnë 1700-vjetorin e Ediktit të Kostandinit
Tetë krerë të Kishave ortodokse, patriku i Kostandinopojës Bartolomeu I, patriku rus
Kirill, patriku ortodoks i Jeruzalemit Teofili III dhe patriku serb Irinej, sëbashku
me krerët e Kishave ortodokse të Shqipërisë, Greqisë, Qipros dhe Polonisë, morën pjesë
të dielën në kremtimet për 1700-vjetorin e Ediktit të Milanos, që u mbajtën në Nish
të Serbisë. Të pranishëm, edhe përfaqësues të Kishës Katolike, të asaj portestante
dhe të besimeve të tjera të krishtera, përveç rreth 15 mijë besimtarëve. Selia e Shenjtë
përfaqësohej nga prefekti i nderit i Kongregatës për Ungjillëzimin e Popujve, kardinali
Jozef Tomko. “Ishte nder dhe gëzim i madh për mua të çoja në kremtimet e Kishës ortodokse
serbe në Nish, përshëndetjen dhe bekimin e Papës Françesku” – deklaron kardinali për
agjencinë kishtare Sir. Përveçse dokument për tolerancën fetare, që shënoi fundin
e persekutimeve kundër të krishterëve, Edikti i Milanos kujton edhe kohën kur Kisha
e Krishtit ishte akoma e bashkuar. Në homelinë e meshës, patriku Bartolomeu I
uroi që në botë të ketë më shumë liri fetare dhe pajtim. “Fatkeqësisht, edhe sot,
ashtu siç ndodhte para Ediktit të Milanos – tha ai – shumë të krishterë persekutohen
për shkak të fesë, sidomos në Lindjen e Mesme, në Siri, në Egjipt e në Irak”. Patriku
bëri thirrje për lirimin e dy ipeshkvijve të rrëmbyer në Siri dhe dënoi fanatizmin
fetar, duke thënë se ka mënyra më paqësore për të kapërcyer ndryshimet.