Afërsia e Papa Françeskut me të mbijetuarit e Lampeduzës. 231, trupat e gjetura në
det
Papa Françesku vazhdon të interesohet për emigrantët e mbijetuar, pas fundosjes tragjike
të barkës, ku ndodheshin rreth 500 vetë, të enjten, para ishullit italian të Lampeduzës.
Deri tani, zhytësit kanë arritur të gjejnë 231 kufoma. I dërguari i Atit të Shenjtë
në ishull, kryeipeshkvi Konrad Krajevski, Lëmoshtar papnor, është interesuar për secilin
prej të mbijetuarve, duke u dhënë atyre Rruzaren e bekuar nga Papa si edhe një ndihmë
financiare për nevojat e para, siç shkruan në një tweet gazeta vatikanase “L’Osservatore
Romano”. Pa dyshim, Lampeduza është njëra nga periferitë ekzistenciale, për të cilat
flet shpesh Papa Bergolio, një periferi, që ka zgjuar debate të mëdha në Itali e në
Evropë. Në Romë, diskutohet për ligjin e emigracionit Bosi-Fini, ndërsa presidenti
Napolitano kërkon të shqyrtohet tema e strehimit politik, për të cilën Italia nuk
ka akoma një normë të mirëpërcaktuar. Nesër, mbërrin në Lampeduzë kryetari i Komisionit
Evropian, Hosé Manuel Barroso, i cili sjell solidaritetin e Brukselit në kufijtë jugorë
të Bashkimit Evropian. Ndërkaq, dje, në gjirin e Sirakuzës, u shpëtuan dhe u ndihmuan
edhe 250 emigrantë të tjerë, ardhur në Evropë për të kërkuar një jetë më të mirë.