Дазволім Богу пісаць
наша жыццё! З такім заклікам папа Францішак звярнуўся падчас ранішняй Эўхарыстыі ў
Доме св. Марты 7 кастрычніка 2013 г. У сваёй гаміліі Пантыфік падкрэсліў, што часам
хрысціянін, католік, можа ўцякаць ад Бога, а грэшнік, якога ўсе лічаць далёкім ад
Яго, наадварот – будзе слухаць голас Пана. Францішак прывёў прыклад біблійнага Ёны,
які шмат маліўся і рабіў добрыя ўчынкі, але калі пачуў канкрэтны заклік Бога, пачаў
уцякаць ад Яго. Паводле Святога Айца, Ёна ўжо запланаваў сваё жыццё і “не хацеў, каб
яго турбавалі”. На думку Францішка, уцякаць ад Бога можна будучы хрысціянінам, католікам,
членам Каталіцкай Акцыі, святаром, біскупам і нават Папам. “Гэта штодзённая спакуса.
Не слухаць Бога, не слухаць Яго голасу, не адчуваць у сэрцы Яго прапаноў, закліку”,
- падкрэсліў Святы Айцец і дадаў, што спосабаў уцёкаў ад Бога існуе шмат.
У
сувязі з гэтым, Папа нагадаў прыпавесць пра міласэрнага самараніна: на дарозе ляжаў
ледзьве жывы чалавек і ўсе, хто праходзілі побач выдумвалі для сябе прычыны, каб не
дапамагаць. Сярод іх былі таксама святар і левіт. Аднак самаранін, “не прызвычаены
да рэлігійных практык, маральнага жыцця, які тэалагічна памыляўся, (...) зразумеў,
што Бог яго клікаў, і не ўцёк”. Самаранін “падышоў, перавязаў яму раны, паліваючы
алеем і віном. Пасадзіў яго на сваю жывёлу”, нават “прывёз у заезд і паклапаціўся
пра яго”. “Патраціў на яго цэлы вечар”, - падкрэсліў Францішак.
“Святар прыйшоў
своечасова на св. Імшу і вернікі былі задаволены; левіт назаўтра меў спакойны дзень,
такі, якім яго задумаў. (...) Чаму Ёна ўцякаў ад Бога? Чаму святар уцякаў ад Бога?
Чаму левіт уцякаў ад Бога? Таму што мелі закрытае сэрца, а калі сэрца закрытае, немагчыма
пачуць голас Бога. Але самаранін, які здзяйсняў падарожжа “убачыўшы, злітаваўся”:
меў адкрытае сэрца, быў чалавечным”, - сказаў Святы Айцец.
Францішак адзначыў,
што самаранін, нягледзячы на тое, што быў грэшнікам, “дазволіў Богу пісаць сваё жыццё”.
Папа заклікаў таксама ўсіх вернікаў быць паслухмянымі Божаму слову, слухаць і знаходзіць
яго ў сваёй штодзённай гісторыі.