Çështja antropologjike, themeli i jetës shoqërore. Kuvendi i Këshillit Papnor për
Familjen
Këshilli Papnor për Familjen, në 30-vjetorin e “Kartës së të Drejtave të Familjes”,
organizon një kuvend me temën: ”Horizontet e reja antropologjike dhe të drejtat e
familjes” ditën e enjte më 24 tetor pranë Domus Pacis në Romë. Punimet do t’i hapë
presidenti i dikasterit, Mons. Vincenzo Paglia. Kardinali filipinas Luis Antonio Tagle,
arqipeshkëv i Manilas, do të drejtojë seancën e parë, ndërsa seancën e pasdites do
ta drejtojë kardinali nigerian John Olorunfemi Onaiyekan, arqipeshkëv i Abujës. Sekretari
i Këshillit Papnor Imz. Jean Laffitte do të mbajë ligjëratën hyrëse me temën: “Themelet
teologjike të Kartës së të Drejtave të Familjes”. Folësit e tjerë janë: filozofi dhe
juristi spanjoll Andés Ollero; studiuesja amerikane e të drejtave të familjes Teresa
Collet; kalorësi i lartë i Kalorësve të Kolombit Carl Anderson; docentja amerikane
Jane Adolphe, historiania italiane Lucetta Scaraffia dhe ekonomisti Stefano Zamagni. Një
komunikatë e Këshillit Papnor për Familjen, dhënë me këtë rast, citon filozofin gjerman
Hans Georg Gadamer e thotë: “Çdo teori e të drejtave nënkupton një vështrim antropologjik
dhe antropologjinë e të drejtave. Është një shkrirje horizonesh”. “Çështja antropologjike”
është esenca e çdo kulture, themeli i jetës shoqërore dhe i të drejtës pozitive. Kriza
e kohës sonë është kryesisht krizë antropologjike, thoshte Gjon Pali II dhe të njëjtën
gjë përsëriste Benedikti XVI dhe rithekson Papa Françesku. Komunikata kujton se
kanë kaluar vetëm pak muaj nga vdekja e njërit prej antropologëve më të mëdhenj të
krishterë, Julian Ries, që shkruante: “Ka më se dy milion vite që vrojtojmë rritjen
e asaj që quajmë njerizim (…) Në historinë e njerëzimit ka një rritje të ndërgjegjes,
që sjell lindjen e kulturave e të feve të mëdha, por vërejmë se që nga shfaqja e vet
njeriu është simbolik dhe fetar. Kjo vetëdije është e rëndësishme për kohën tonë”.
Kuvendi, përfundon komunikata, “përbën një rast të rëndësishëm për dialog dhe
për rritje jo vetëm në kishë, por edhe në shoqëri. Për këtë arsye, presim një pjesëmarrje
të madhe. Kush dëshiron të regjistrohet, mjafton të dërgojë një email në adresën:
brenda ditës së premte 18 tetor”.