Папа ў сядзібе біскупа Асізі: скінуць з сябе шаты духа свету
Касцёл павінен скінуць
з сябе шаты духа свету. З такім заклікам 4 кастрычніка 2013 г. папа Францішак звярнуўся
наведваючы сядзібу біскупа Асізі – месца перад якім, у 1206 г. св. Францішак зняў
з сябе вопратку на знак поўнай адданасці Богу і бедным. Тут Папа сустрэўся з беднымі,
якім дапамагае мясцовае аддзеленне “Caritas”. Ён нагадаў, што на працягу некалькіх
апошніх дзён многія СМІ казалі аб тым, што “Папа ідзе туды, каб скінуць шаты з Касцёла”,
“ён скіне шаты з біскупаў, кардыналаў, распране самаго сябе...” “Гэта добрая нагода,
каб запрасіць Касцёл скінуць з сябе шаты. Але Касцёлам з’яўляемся ўсе мы! Усе!”, -
сказаў Пантыфік і нагадаў, што кожны павінен ісці шляхам Езуса, які таксама прайшоў
праз “распрананне” – стаў слугой, захацеў прынізіць Сябе аж да крыжа. “А ці нельга
зрабіць хрысціянства крыху больш гуманным?”, - паўтарыў Папа пытанне якім задаюцца
многія – “без крыжа, без Езуса, без распранання”. Паводле Святога Айца, у такім выпадку
хрысціяне стануць “людзьмі з кандытарскай, як прыгожыя торты, як салодкія прысмакі...
Прыгожымі, а не сапраўднымі хрысціянамі!”
“Нехта можа спытаць: але шаты чаго
павінен скінуць з сябе Касцёл?”, - працягнуў Папа і адзначыў, што ў першую чаргу ён
павінен скінуць з сябе самую небяспечную пагрозу: “небяспеку духа свету”. “Хрысціянін
не можа жыць духам свету. Дух свету вядзе да марнасці, дамінавання, пыхі. А гэта ідал,
не Бог. Гэта ідал. А ідалапаклонства – гэта самы вялікі грэх”, - сказаў Папа.
Францішак
падкрэсліў, што дух свету з’яўлецца супрацьлеглым благаславенствам пра якія казаў
Хрыстус і супрацьлеглы духу Езуса. “Дух свету чыніць нам шкоду. Як сумна бачыць хрысціяніна
ахопленага духам свету, упэўненага ў бяспецы, якую ён дае”, - сказаў Папа і дадаў,
што ўсе члены Касцёла павінны скінуць з сябе яго шаты.