Ati i Shenjtë, në takimin me rininë në Asizi, u kërkon të rinjve të ndjekin Ungjillin
e Krishtit me guxim, në punë, familje e mision
Imazhi i fundit, që la Papa Françesku, në përfundim të shtegtimit në Asizi, në qytetin
italian të shenjtit të të varfërve, ishte ai i lutjes në strehën, apo koliben e shën
Françeskut në shenjtëroren e Rivotortos, por takimi i fundit i Atit të Shenjtë ishte
ai me rininë, që e priti gjithë ditën, me këngë e lutje, në sheshin e Bazilikës. Para
se t’i përqafonte të rinjtë me dashuri, Papa Françesku shkoi të lutej teka varri i
Shën Kiarës e para të Kryqëzuarit të Shën Damianit. Por çfarë u tha Papa të rinjve,
të cilët i drejtuan katër pyetje: për thirrjen meshtarake, për familjen, për punën
e për misionin? U foli për martesën, u tha të kapërcejnë edhe sprovat më të vështira,
u tha të kenë marrëdhënie familjare me Hyjin për të arritur t’i përgjigjen pozitivisht
thirrjes së Tij, u tha të ndjekin Ungjillin e Krishtit. Me të rinjtë, që takuan Papën,
ishte sot i pranishëm edhe një meshtar shqiptar, don Lekë Marku, i cili shërben në
Umbria. Ta dëgjojmë, në mikrofonin tonë...