Հայր Ֆետերիքօ Լոմպարտտիի Տեղեկութիւնները ''Կարտինալական Խորհուրդի'' Ժողովի Մասին։

Երեքշաբթի 1 հոկտեմբերի առաւօտեան, սկիզբ առած, Ֆրանչիսկոս Քահանայապետի նախագահութեամբ ու անոր կամքով ստեղծուած` ''Կարտինալական - ութեակ- Խորհուրդի'' նիստերը վերջ կը գտնեն այսօր` 3 հոկտեմբերի երեկոյեան։

Վատիկանի բանբեր` Հայր Ֆետերիքօ Լոմպարտին, այսօր կէսօրին, մամուլին հետ ունեցած հանդիպումին ընթացքին տեղեկացուց թէ ժողովի ընթացքին շօշափուած զանազան նիւթերու շարքին էին ''Քուրիայի վերակազմութիւնը'' եւ “Pastor bonus” - Բարի Հովիւ - առաքելական սահմանադրութեան ամբողջական վերատեսութիւնը, որ յատկապէս շեշտեցին ''Քուրիայի'' սպասարկութեան բնոյթի մասին Տիեզերական Եկեղեցւոյ եւ տեղական եկեղեցիներու ի սպաս։ Այս առընչութեան խօսուեցաւ նաեւ Վատիկանի Պետքարտուղարի դերին ու անոր գրասենեակի պարտականութիւններուն մասին որ պէտք հանդիսանայ ''Քահանայապետի Քարտուղարութեան'' գրասենեակ։ Հայր Լոմպարտին յիշեցուց թէ յառաջիկայ 15 հոկտեմբերին նորանշանակ Պետքարտուղարը` Գերապայծառ Բարոլինը պաշտօնի գլուխ պիտի անցնի։ Վատիկանի բանբերը հուսկ մատնանշեց թէ շօշափուած նիւթերու շարքին էր նաեւ Վատիկանի ''վերին իշխանութեան'' պատասխանատուներու համադրութեան հարցը ու անոնց` Սրբազան Քահանայապետին հետ ունեցած յարաբերութիւնը։ Կարտինալական Խորհուրդի անդամները խորհրդածեցին նաեւ Եկեղեցւոյ կեանքէն ներս ''աշխարհականներու'' դերին մասին - յայտնեց Հայր Լոմպարտին ու ակնարկեց թէ ''եպիսկոպոսներու սիւնհոդոսի'' նիւթը եւս պիտի վերարծարծուի յետմիջօրէի նիստերու ընթացքին։ Ան ապա ներկաներուն տեղեկացուց թէ հաւանական է որ Կարտինալական Խորհուրդը իր յաջորդ հաւաքը պիտի գումարէ նոր տարուայ սկիզբը։