''Կարտինալական Խորհուրդի'' Ժողովները Կը Շարունակուին։

Երեքշաբթի 1 հոկտեմբերի առաւօտեան, սկիզբ առին, Ֆրանչիսկոս Քահանայապետի նախագահութեամբ ու անոր կամքով ստեղծուած` ''Կարտինալական - ութեակ- Խորհուրդի'' նիստերը որ պիտի տեւեն մինչեւ 3 հոկտեմբեր։

Վերոյիշեալ խորհուրդի պարտականութիւնն է, ըստ 28 սեպտեմբեր թուակիռ Քահանայապետական ձեռագիրին, ''Օգնել Սուրբ Պետրոսի յաջորդին ''Տիեզերական Եկեղեցիի Կառավարելու առաքելութեան'' ու ապա ''ուսումնասիրել Բարի Հովիւ - Pastor Bonus - Առաքելական Սահմանադրութեան վերատեսութիւնը։

Վատիկանի բանբեր` Հայր Ֆետերիքօ Լոմպարտին չորեքշաբթի 2 հոկտեմբերի կէսօրին, մամուլին հետ ունեցած հանդիպումին ընթացքին յայտնեց թէ ''ամէն առաւօտ ժամը 7-ին Տոմուս Սանդա Մարդայի մատրան մէջ կարտինալական խորհրուդի անդամներն ու Սրբազան Քահանայապետը միասին կը համապատարագէն ու ապա առաւօտեան ժամը 9 - 12,30 եւ յետմիջօրէի ժամը 16 - 19 տեղի կ՛ունենան Խորհրդակցական նիստերը''։Հայր Լոմպարտի ապա նշեց թէ երեքշաբթի առաւօտեան բացման նիստը տեղի ունեցաւ Քահանայապետական Տան Մատենադարանի սրահին մէջ իսկ յետմիջօրէէն սկսեալ Ժողովականները փոխադրուեցան Սանդա Մարդայի սրահը ուր կը շարունակեն իրենց աշխատանքները։Իսկ այսօր (2/10), չորեքշաբթի օրուայ հրապարակյաին ունկնդրութեան պատճառաւ, Նորին Սրբութիւնը չի կարողացաւ նախագահել առաւօտեան նիստը։
Հայր Լոմպարտին հուսկ յայտնեց թէ վերոյիշեալ նիստերը ունին խորհրդակցական բնոյթ եւ թէ ժողովներու ընթացքին շօշափուած նիւթերը կեդրոնացան առ այժմ Վատիկանեան Տիեզերական Բ ժողովի ''եկեղեցաբանութեան'' նիւթին վրայ ու Եկեղեցւոյ աստուածաբանական ու հոգեւոր տեսութեան, որուն լուսարձակի տակ յետագային պիտի քննարկուին ''Եկեղեցական'' կառոյցի ու անոր կազմակերպութեան հարցերը։ Երեքշաբթի օրուայ յետմիջօրէի նիստի ընթացքին ժողովականները անդրադարձան ''Եպիսկոպոսական Սիւնհոդոսի'' նիւթին եւ այս առթիւ նիստերուն իր մասնակցութիւնը բերաւ նաեւ Եպիսկոպոսական Սիւնհոդի Քարտուղար` գերապայծառ Պալտիսսէրին։ Շօշափուած ու կարեւոր այլ նիւթերէն մին եղաւ - յայտնեց ի մէջ այլոց Հայր Լոմպարտին - ''Ընտանիքի'' հովուութիւնը։ Ան ապա ակնարկեց թէ այսօրուայ նիստերու ընթացքին հաւանական է որ խօսուի ''Քուրիայի'' վերակազմութեան մասին, Պետական քարտուղարութեան դերին, Քահանայապետի կապին Սուրբ Աթոռի վերին իշխանութեան հետ. եւայլն...ընդարձակ նիւթեր որոնք երկար ժամանակի խորհրդակցութեան կը կարօտին։