Siria, paqja në vendet në konflikt, zhvillimi i qëndrueshëm. Fjala e Imz. Mambertit
në OKB
Paqja është një kusht i paanashkalueshëm për zhvillimin e tërësishëm njerëzor. Paqja
dhe synimet për zhvillim në të mirë të çdo banori të tokës mund të arrihen vetëm nëse
çdo shtet ”merr mbi vete tërë përgjegjësinë e vet për të mirën e përbashkët të të
gjithëve”. Kështu ka thënë dje në New York Imz. Mamberti, Sekretar për Marrëdhëniet
me Shtetet, gjatë fjalimit në seksionin e 68-të të Asamblesë së Përgjithshme të OKB-së,
që iu kushtua tragjedisë siriane. Duke nënvizuar rëndësinë e temës së zgjedhur për
seancën,: ”Të përgatisim truallin për programin për zhvillim pas 2015-tës”, Imz. Mamberti
vuri në dukje si pas pak më shumë se një viti nga afati i caktuar nga OKB-ja për objektivat
e Mijëvjeçarit, këta mbeten përbotërisht të paarrira. Kjo ndodh kryesisht për shkak
të vështirësive për të zgjedhur mjetet për realizimin e Objektivit të tetë, që ka
të bëjë me burimet e nevojshme për arritjen e shtatë të tjerëve. Në lidhje me këtë,
Mamberti ka vënë në dukje se si pas krizës së 2008 është e ngutshme të përfshihen
të gjitha shtetet për përkufizimin e politikave ekonomike ndërkombëtare për mbështetjen
e një finance më të përgjegjshme dhe më të barabartë. Edhe krijimi i një sistemi financiar
ndërkombëtar i njohur nga të gjitha shtetet, vijon diplomati i Vatikanit, do të ishte
i pamjaftueshëm po të mos ballafaqoheshin në mënyrë të qëndrueshme përfundimet me
objektivat e caktuar për përmirësimin e kushteve të jetës së atij që është në nevojë.
Nyja kryesore mbetet ajo e paqes, pa të cilën nuk mund të ketë zhvillim. Për këtë
arsye është i domosdoshëm një rikthim tek parimet themeltare mbi të cilët është angazhuar
solemnisht bashkësia ndërkombëtare para 70 vjetësh, duke filluar që nga kufizimi i
përdorimit të forcës për zgjidhjen e konflikteve. ”Është tragjike të konstatosh se
ende sot, mekanizmat e zgjedhur nga OKB-ja nuk kanë mundësuar shmangien e konflikteve
të rënda civile e rajonale, as mbrojtjen e popujve”, thotë Mamberti. Kjo shihet në
rastin e Kongos, të Afrikës Qendrore dhe të Lindjes së Mesme. Pavarësisht këtyre vështirësive,
theksoi ai. Përvoja e OKB-së për ruajtjen dhe forcimin e paqes duhet vlerësuar si
pozitive, sepse shpreh në mënyrë konkrete dy parimet e mëdha të së drejtës natyrale
që lidhen ngushtë me të drejtat e njeriut: shmangia e luftës, për sa të jetë e mundur,
dhe vlefshmëria e përhershme e ligjit moral gjatë konflikteve të armatosura. Më tej
Mamberti është ndalur tek çështja siriane, duke paraqitur shqetësimin e thellë të
Selisë së Shenjtë për gjendjen e të krishterëve dhe të pakicave të tjera siriane,
që ”nuk duhet të detyrohen të kërkojnë azil, por, përkundrazi, duhet të luajnë rol
në përbërjen politike të ardhshme të vendit dhe duhet të ndihmojnë për të mirën e
përbashkët. Sekretari për Marrëdhëniet me Shtetet ka kujtuar edhe thirrjen që Papa
Françesku u ka drejtuar udhëheqësve të G20 në Shën Pjetërburg mbi përgjegjësinë e
bashkësisë ndërkombëtare kundrejt Sirisë dhe për zgjidhjen paqësore të konfliktit
me anë të dialogut. Pa e nënçmuar angazhimin e agjencive të OKB-së për mbrojtjen e
civilëve, ka thënë se shteteve u mungon guximi ”për t’i dhënë përparësi më të madhe
angazhimit ndërkombëtar për zgjidhjen e konflikteve”. Ka kujtuar parimin e ”përgjegjësisë
për të mbrojtur”, të formuluar nga kryesia botërore e OKB në 2005 dhe plotësisht të
pranuar nga Selia e Shenjtë. Kjo përgjegjësi, tha, nuk nënkupton vetvetiu përdorimin
e armëve, por vënien në veprim të menjëhershëm të të gjitha masave rrethanore si diplomacia,
ekonomia, opinioni publik dhe të gjitha procedurat që parashikon Karta e Kombeve të
Bashkuara. Në këtë kuptim, tragjedia e Sirisë përbën ”një sfidë dhe një mundësi për
OKB-në”. Në lidhje me këtë Mamberti ka shprehur vlerësimin e Selisë së Shenjtë për
Resolutën 2118 mbi zhdukjen e armëve kimike në Siri, të miratuar nga Këshilli i sigurisë
më 27 shtator. Duke përfunduar, tha: ”Një zgjidhje paqësore dhe afatgjatë e konfliktit
sirian do të vendoste një precedent domethënës për shekullin tonë dhe do të lehtësonte
përfshirjen e parimit të ”përgjegjësisë për të mbrojtur” në Kartën e Kombeve të Bashkuara.”