Filluan kremtimet për 50-vjetorin e Enciklikës “Pacem in Terris”
Filluan sot në Vatikan, ditët e kremtimit të 50-vjetorit të Enciklikës “Pacem in terris”.
Sot, rektorët e profesorët e universiteteve papnore e katolike të botës, reflektuan
mbi temën “Formimi i brezave të rinj të katolikëve të impenjuar në politikë”. Takimi
i sotëm - i organizuar nga Këshilli Papnor për Drejtësinë e Paqen, ashtu si ditët
e tjera të kremtimeve, që do të përfundojnë më 4 tetor – u zhvillua me dyer të mbyllura.
Në katër grupet e punës u trajtuan tema, që do të publikohen më vonë, sipas stilit
të librit “Vokacioni i Drejtuesit” të këtij Këshilli. Nesër, takimi zhvendoset
në Sallën e Sinodit në Vatikan, për të trajtuar temën “Organizimi Ndërkombëtar dhe
e Mira e Përbashkët Universale: aktualiteti i mesazhit të ‘Pacem in Terris’”. Pjesëmarrësit
do të diskutojnë për reformën e OKB-së në dritën e kësaj enciklike të Papës Gjoni
XXIII dhe për sfidat e botës bashkëkohore, ndër të cilat, ambienti, konkurenca për
lëndë të parë, puna dhe mbrojtja e të drejtave të njeriut. Kulmin, kjo ditë, e arrin
pak pas mesditës, kur të gjithë pjesëmarrësit do të priten në audiencë nga Papa Françesku.
Të premten, më 4 tetor, do të zhvillohet seminari me temë “Paqja: sfida të reja”.
Në tryeza të rrumbullakëta do të flitet për dialogun ndërfetar e persekutimin e të
krishterëve në botë, për krizën ekonomike dhe hierarkinë e vlerave, për emergjencën
edukative, mass mediat e paqen. Gjithashtu, do të diskutohet për konfliktet, që shkaktohen
nga lufta për lëndët e para, për përdorimin e shkencave biologjike si kërcënim për
dinjitetin e njeriut, për paqen e armatimet. Ky seminar do të jetë i hapur për publikun
e do të zhvillohet në Domus Pacis, në rrugën Torre Rossa 94, në Romë.