Papa në meshën e mëngjesit me kardinajtë këshilltarë: puna jonë të na bëjë më të përvuajtur
për të dhënë një dëshmi të bukur të Kishës
Papa Françesku e kremtoi meshën e mëngjesit së bashku me prelatët e “Këshillit të
kardinajve”, të cilët, që sot, mblidhen në Vatikan me Atin e Shenjtë, deri më 3 tetor.
Në homeli, Papa uroi që këto takime të shërbejnë për t’ua shtuar të gjithëve besimin
tek Zoti. Në Ungjillin e sotëm, Jezusi i kritikon dy apostujt, të cilët donin t’u
binte zjarri hyjnor mbi kokë, atyre, që nuk i mirëprisnin. Rruga e të krishterit,
komentoi Horhe Mario Bergolio, nuk është ajo e hakmarrjes, por e butësisë, e përvuajtërisë,
e mirësisë. Forcën, që na çon drejt udhës së drejtë, e gjejmë në dashurinë, në bamirësinë,
në vetëdijen se jemi në dorën e Hyjit. Kur e ndjejmë këtë, nënvizoi Papa Françesku,
nuk na vjen të hedhim zjarr e flakë nga qielli. E duke përmendur shembullin e Shën
Terezës së Krishtit Fëmijë, tha: “Na vjen fryma tjetër, shpirti i bamirësisë,
që vuan, që fal gjithçka, që nuk mburret, që është i përvuajtur… Ndokush – e ka pasur
disa filozofë, që e mendonin këtë – mund të thotë se kështu përulet njeriu, vihet
në diskutim madhështia e tij. Nuk është e vërtetë! Me të drejtë, Kisha e ka bërë këtë
shenjte të përvuajtur, të vogël, plot besim në Zotin, të butë, e ka bërë Pajtore të
Misioneve”. Forca e Ungjillit, shtoi Ati i Shenjtë, është pikërisht në përvuajtërinë,
që ashtu si fëmija na bën ta lëmë vetveten në dorë të dashurisë e të ëmbëlsisë së
Atit Qiellor: “Kisha – na thoshte Benedikti XVI – nuk rritet për shkak të prozelitizmit,
rritet për hir të joshjes nga mesazhi i saj, për hir të dëshmisë. E kur njerëzit e
popujt e shohin dëshminë e përvuajtërisë, të butësisë, të shpirtmadhësisë, ndjejnë
atë nevojë, që e përshkruan Zakaria profet: “Duam të vimë me ju!”. Njerëzit e ndjejnë
atë nevojë vetëm para dëshmisë së dashurisë, të dashurisë së butë, pa prepotencë,
të përvuajtur e jo mendjemadhe! Adhurim e shërbim!” Ja përse një murgeshë shumë
e përvuajtur, por me besim të madh në Zotin, siç ishte shën Tereza e Krishtit Fëmijë,
u zgjodh Pajtore e Misioneve nga Kisha, pasi shembulli i saj i bën njerëzit të thonë:
“Duam të vijmë me ju!”. Papa Françesku e përfundoi predikimin e tij me një mendim
të veçantë për “Këshillin e kardinjave”, që u mblodh sot në Vatikan së bashku me të,
për këshillime lidhur me çështjet e qeverisjes së Kishës: “Sot, këtu, në Vatikan,
fillon mbledhja me kardinajtë këshilltarë, që po bashkëkremtojnë me mua meshën. T’i
lutemi Zotit që puna e sotme të na bëjë më të përvuajtur, më të butë, më të durueshëm,
me besim më të madh në Zotin, sepse kështu, Kisha mund të japë një dëshmi të bukur
për njerëzit, të cilët, duke parë Popullin e Zotit, duke parë Kishën, mund të ndjejnë
dëshirën për t’u bashkuar me ne!”