Кс. Ламбардзі пра сімвалізм і гістарычнасць візіту Папы ў Асізі
Сімвалічным назваў
хуткі візіт Папы ў Асізі кс. Фэдэрыка Ламібардзі, кіраўнік Залы Друку Апостальскай
Сталіцы, у інэрв’ю францішканскаму сайту “sanfrancesco.org”. “Гэта вельмі важны візіт
з духоўнага пункту гледжання”, - падкрэсліў святар, бо сам Францішак у першыя дні
пантыфікату неаднаразова тлумачуў сувязь свайго служэння з асізскім харызматам, які
ўключае ў сябе клопат пра бедных, імкненне да міру, любоў да стварэння. Паводле кс.
Ламбардзі, гэта не абстрактныя для папы Францішка паняцці, ён адкрыта і на практыцы
выказваў сваю салідарнасць з людзьмі, якія адчуваюць на сабе розныя формы цярпення,
што існуюць у грамадствах. Беднасць для Папы мае таксама духоўнае вымярэнне, звярнуў
увагу святар. Заклікі Святога Айца да міру насілі настолькі моцны і пераканаўчы характар,
што знайшлі сваё адлюстраванне ў палітычнай і грамадскай думцы, і асабліва гэта паказалі
апошнія тыдні, сказаў кіраўнік Залы Друку, маючы на ўвазе ініцыятывы Пантыфіка па
Сірыі. Святар перакананы, што з вуснаў Папы мы яшчэ шмат пачуем і аб абароне стварэння,
бо гэта толькі пачатак яго пантыікату.
Кс. Ламбардзі заўважыў, што Францішак
кардынальна змяніў характэрны для папярэдніх пантыфікатаў стыль і спосаб камунікацыі
з сучасным светам. Гаворка ідзе перш за ўсё пра СМІ, якія актыўна адгукнуліся на гэтыя
змены. Прыкладам таму, вялікая колькасць журналістаў, акрэдытаваных у Асізі на візіт
Папы 4 кастрычніка, у першую чаргу замежных. Медыя проста не маглі не адрэагаваць
станоўча на адкрытасць Пантыфіка, яго простую мову і небанальныя жэсты, узмоцненыя
непасрэдным кантактам з людзьмі, лічыць кс. Ламбардзі.
Папа – гэта чалавек,
які жыве спантаннасцю і які абвяшчае з такой жа спантаннасцю і непасрэднасцю жыцця
пасланне Божай любові, што знаходзіць водгук у людзях, якія такім жа чынам прымаюць
гэта пасланне, сказаў кіраўнік Залы Друку напярэдадні візіту Святога Айца ў Асізі.