Të lutemi që Zoti të na japë hirin për të mos ikur nga Kryqi: kështu, Papa Françesku në meshën e mëngjesit në Shtëpinë e Shën Martës

Të lutemi që Zoti të na japë hirin për të mos ikur nga Kryqi: kështu tha Papa Françesku në meshën e mëngjesit në Shtëpinë e Shën Martës. Homelia u bazua në Ungjillin e ditës, në të cilin Jezusi u kumton dishepujve të vet Mundimet e ardhshme. Fjalët e Jezusit, nënvizoi Papa, i shtangin dishepujt, që mendonin se Biri i Zotit ishte i destinuar për triumf, prandaj nuk e kuptonin, por kishin frikë edhe ta pyesnin, kishin frikë nga e vërteta:
“Kishin frikë nga Kryqi, kishin frikë nga Kryqi… Por jo vetëm dishepujt, jo vetëm Pjetri, por edhe vetë Jezusi kishte frikë nga Kryqi! Ai nuk mund ta gënjente veten, Ai e dinte. Kaq shumë kishte frikë Jezusi, sa mbrëmjen e së enjtes derdhi djersë gjaku… ‘O Atë hiqe prej meje këtë Kelk. Por, u bëftë vullnesa jote!’ Ky ishte ndryshimi me të tjerët”.
Edhe kur ungjillëzojmë, sot, Kryqi na shkakton frikë, por, nënvizoi Papa, ekziston rregulla, sipas së cilës dishepulli nuk është më i madh se Mësuesi. Ekziston rregulla, që thotë se s’ka shëlbim, pa djersë gjaku, nuk ka vepër apostolike të frytshme pa Kryqin:
“Ndoshta ne, secili prej nesh, mendon: ‘Po mua, ç’do të më ndodhë? Si do të jetë Kryqi im?’. Nuk e dimë. Nuk e dimë, por do të vijë! Duhet të lutemi për hirin që të mos ikim nga Kryqi, kur të vijë: me frikë eh! Është e vërtetë! Kemi frikë, si jo. Por ndjekja e Jezusit përfundon aty. Më vijnë ndërmend fjalët e fundit të Jezusit për Pjetrin, në atë lloj kurorëzimi papnor, që ndodhi në Tiberiadë: ‘A më do? Kullote grigjën time!’… Por fjalët e fundit ishin: ‘Do të të çojnë aty ku ti nuk do që të shkosh!’ Ky është premtimi i Kryqit”.
Papa e përfundoi homelinë, me lutjen për Zojën e Bekuar:
“Krejt afër Jezusit, në Kryq, ishte nëna e Tij. Ndoshta sot, duke iu lutur, do të ishte mirë t’i kërkonim hirin që të mos na e heqë frikën – ajo do të vijë… frika nga Kryqi… - por të na ndihmojë të mos ikim nga Kryqi. Ajo ishte aty dhe e di si duhet qëndruar pranë Kryqit”.