Кардынал: “Pastor Bonus” больш не можа быць кропкай адліку ў рэформе Рымскай курыі
Існуючая сістэма працы
Рымскай курыі ўжо не адказвае патрабаванням часу, а рэформа цэнтральных органаў Касцёла
патрабуе працяглага абмеркавання і разважання, сказаў кардынал Оскар Радрыгес Марадзьяга.
Гандураскі іерарх з’яўляецца каардынатарам створанай Пантыфікам 13 красавіка 2013
г. групы з васьмі кардыналаў, якія павінны дапамагаць Святому Айцу ў кіраванні Сусветным
Касцёлам і заняцца вывучэннем праекту перагляду канстытуцыі “Pastor Bonus” у пытанні
рэарганізацыі Рымскай курыі. Ён даў інтэрв’ю канадскаму каталіцкаму тэлебачанню “Salt
and Light Television”. Святы Айцец сустрэнецца з Групай 1-3 кастрычніка ў Ватыкане.
Кардынал
Марадзьяга прызнаўся, што ўжо праз чатыры дні пасля свайго абрання папа Францішак
вырашыў, што арцыбіскуп Паралін стане новым Дзяржаўным сакратаром, хоць прызначэнне
адбылося ў канцы жніўня. Гаворачы аб рэформе Рымскай курыі, арцыбіскуп Тэгусігальпу
адзначыў, што на гэты конт было атрымана шмат прапаноў з розных краін свету. Толькі
з Лацінскай Амерыкі надышло 80 старонак матэрыялаў.
Перад сустрэчай са Святым
Айцом розныя прапановы былі згрупаваныя ў адпаведнасці з асноўнымі тэмамі. Кардынал
бачыць у іх значныя падабенствы, што дазваляе яму без сумневу казаць пра дзеянне Святога
Духа. Па словах каардынатара кардыналькай групы, Апостальская канстытуцыя “Pastor
Bonus” больш не можа быць кропкай адліку ў працы над рэформай Рымскай курыі. Настала
неабходнасць распрацоўкі новага дакумента, і гэта запатрабуе працяглага абмеркавання
і разважання, сказаў каардынтар “групы васьмі”.
Раней кардынал Марадзьяга заяўляў,
што амаль адразу пасля стварэння кардынальская група пачала інтэнсіўна працаваць.
У яго ўжо была магчымасць абмеркаваць бягучыя пытанні непасрэдна з папам Францішкам.
Гэта адбылося падчас візіту Пантыфіка ў Рыа-дэ-Жанейра, дзе кардынал Марадзьяга праводзіў
катэхезы ў рамках Сусветных дзён моладзі. Іерарх заяўляў таксама, што дзякуючы сабраным
прапановам ужо створаны свайго роду рабочы дакумент, які стане асновай для абмеркавання
падчас сустрэчы з Папам.