Філіпінскі кардынал: Францішак заваяваў сэрцы азіятаў
Як на Касцёл у Азіі
глядзіць папа Францішак? - на гэта пытанне ў размове з Ватыканскім радыё адказаў кардынал
Луіс Антоніа Тагле, арцыбіскуп Манілы. Філіпінскі іерарх перакананы, што місійная
праца ў Азіі магчыма толькі шляхам дыялогу, і ён павінен развівацца ад “місіі да народаў”
(missio ad gentes) у напрамку “місіі сярод народаў” (missio inter gentes). Кардынал
назваў тры тыпу дыялогу: дыялог з беднымі, дыялог з традыцыйнымі і новымі культурамі
і дыялог з традыцыйнымі рэлігіямі. “Мы вельмі рады , што ў нас ёсць Папа, які падтрымлівае
гэты шлях дыялогу. Гэта не лёгка, як меншасць весці дыялог з буйнымі рэлігіямі ў Азіі,
але гэта магчыма”, - сказаў іерарх.
Каталіцкі Касцёл у Азіі вельмі ўзрадавала
навіна аб прызначэнні арцыбіскупа Параліна Дзяржсакратаром Яго Святасці Папы, паведаміў
кардынал Тагле. Новы бліжэйшы супрацоўнік Святога Айца мае вопыт у вядзенні перамоў
з Кітайскай Народнай Рэспублікай і шмат дапамог Касцёлу ў Азіі, асабліва, што тычыцца
адносін з В’етнамам. Мясцовы Касцёл, паводле меркавання філіпінскага іерарха – гэта
Касцёл бедных, меншасцяў і мігрантаў.
Арцыбіскуп Манілы паведаміў, што філіпінцы
вельмі віталі абранне Францішка. “Людзі прынялі Папу з любоўю, чуласцю і запалам,
бо ён паказвае твар Касцёла, які вельмі блізкі да азіяцкай культуры”, - сказаў ён.
Тое, што Пантыфік падкрэслівае важнасць міжчалавечых адносін, для азіятаў з’яўляецца
выразам духоўнасці і блізкасці да Бога, сказаў кардынал Тагле. Гэтым, паводле яго,
папа Францішак заваяваў сэрцы філіпінскіх і азіяцкіх вернікаў.