Երէկ` չորեքշաբթի, 25 սեպտեմբերի երեկոյեան ժամը 7:00-ին, Հայկազեան համալսարանի հանդիսասրահին
մէջ տեղի ունեցաւ «Հայկազեան հայագիտական հանդէս»-ի 33-րդ հատորի շնորհահանդէսը: Բացման
խօսքը արտասանեց դոկտ. Արմէն Իւրնեշլեան: Ան խօսեցաւ հայագիտութեան մարզին մէջ Հայկազեան
համալսարանի եւ «Հայկազեան հայագիտական հանդէս»-ին ունեցած դերակատարութեան մասին: Իւրնեշլեան
նաեւ անդրադարձաւ անցեալ տարի համալսարանին մէջ կազմակերպուած հայ գրատպութեան 500-ամեակի
ձեռնարկներուն` աւելցնելով, որ «Հայկազեան հայագիտական հանդէս»-ի այս` 33-րդ հատորին
մէջ ուսումնասիրութիւններ ունին 24 հոգի: Առաջին անգամ ըլլալով թաքուն հայերու հարցին
մասին կայ 4 ուսումնասիրութիւն: Ապա Իւրնեշլեան բեմ հրաւիրեց դոկտ. Արտա Էքմեքճին,
որ ներկայացուց «Հայկազեան հայագիտական հանդէս»-ի գլխաւոր խմբագիր Հ. Անդրանիկ Ծ. վրդ.
Կռանեանի գործունէութիւնը: Էքմեքճի իր կարգին բեմ հրաւիրեց Լիբանանի մէջ Հայաստանի դեսպան
Աշոտ Քոչարեանը, որ հայր Կռանեանը պարգեւատրեց Հայաստանի Հանրապետութեան Ազգային գրադարանի
«Յակոբ Մեղապարտ» մետալով: Խօսք առաւ նաեւ Հ. Անդրանիկ Ծ. վրդ. Կռանեան, որ անդրադարձաւ
դժուար պայմաններու մէջ «Հայկազեան հայագիտական հանդէս»-ի լոյս ընծայման` աւելցնելով,
որ համալսարանին տնօրէնութիւնը միշտ ալ աջակցած է հանդէսին լոյս ընծայման: Աւարտին
խօսք առաւ Հայկազեան համալսարանի նախագահ վեր. դոկտ. Փոլ Հայտոսթեան, որ ուրախութիւն
յայտնեց, որ այս տարի 4 նոր ուսանողներ արձանագրուած են համալսարանի հայագիտական ճիւղին
մէջ: Վեր. Հայտոսթեան ըսաւ, որ հայ մտաւորականներուն միջեւ հասարակաց յայտարարներ գտնելը
դժուար գործ է, ինչ որ լաւապէս կը կատարէ «Հայկազեան հայագիտական հանդէս»-ը: Շնորհահանդէսին
աւելի մանրամասն կ՛անդրադառնանք հետագային: