Папская рада ініцыявала сустрэчу аб ролі жанчын у Касцёле
Папская рада па справах
свецкіх абвясціла аб правядзенні ў Рыме даследчага семінару, прысвечанага ролі і годнасці
жанчыны ў Касцёле. Форум адбудзецца 10-11 кастрычніка, у 25-ю гадавіну публікацыі
Апостальскага паслання бл. Яна Паўла II “Mulieris dignitatem”, у якім была падкрэслена
цэнтральная роля і пакліканне жанчын у Касцёле і грамадстве. Ініцыятарам выступіла
жаночая секцыя Папскай рады. Ян Павел II у сваім дакуменце падкрэсліў актуальнасць
тэмы ўзаемаадносін паміж мужчынам і жанчынай з адпаведнай ім своеасаблівасцю, што
ўяўляе сабой цэнтральны момант “антрапалагічнага пытання”, настолькі вырашальнага
ў сучаснай культуры і, у рэшце рэшт, у любой культуры. Папа сцвердзіў, што хрысціяне
павінны развіваць культуру, якая прызнае за жанчынай, у галіне права і ў рэчаіснасці,
належную ёй годнасць, якая дазваляе ёй супрацоўнічаць у стварэнні грамадства. Ян Павел
II назваў гэта “тыповым жаночым геніем”.