Святы Айцец: нават грахі і ідалапаклонства не прымусяць Бога пакінуць чалавека
Значэнню сакрамэнтаў
прысвяціў сваю гамілію падчас раннішняй Эўхарыстыі ў Доме св. Марты папа Францішак
24 верасня 2013 г. Сакрамэнт – гэта сустрэча, а не нейкі магічны абрад, падкрэсліў
Пантыфік. Ён прапанаваў свае разважанні над рэфрэнам псальма, прызначанага на сённяшнюю
літургію, “з радасцю пойдзем у дом Пана Бога”. Гэтыя словы пацвярджаюць пастаянную
прысутнасць Пана ў нашым жыцці, - сказаў Святы Айцец, дадаючы, што народ Божы перажываў
прыгожыя моманты, натхнёныя радасцю, але былі і перыяды змрочныя , поўныя “болю, мучаніцтва
і граху”. У абодвух выпадках Бог застаецца са сваім народам, ніколі не пакідае яго,
бо ўжо ў дзень першага граху зрабіў свой выбар: што будзе ствараць гісторыю са сваім
народам, - сказаў Пантыфік . Больш за тое – ён пажадаў стаць адным з нас, і як адзін
з нас вандраваць з намі, у Езусе . “І гэта кажа нам аб пакоры Бога”, - адзначыў Папа.
Такім
чынам, паводле Францішка, веліч Бога – у Яго пакоры. Ён хацеў вандраваць са сваім
народам, а калі той адыходзіў ад Яго праз свае грахі і ідалапаклонства , Ён заставаўся
там і чакаў. Таксама і Езус прыходзіць са сваёй “паставай пакоры” і хоча ісці са сваім
народам, з грэшнікамі, але і з высакамернымі, бо шмат зрабіў “каб дапамагчы гордым
сэрцам фарысеям” , - сказаў Святы Айцец.
Ён адзначыў, што “Божая пакора заўсёды
чакае, Бог побач з намі, падарожнічае з намі, у сваёй пакоры заўсёды чакае нас”. І
Касцёл з радасцю праслаўляе пакору Бога, Які суправаджае нас.
Папа адзначыў,
што Езус таксама суправаджае нас у нашым асабістым жыцці, і робіць гэта з дапамогай
сакрамэнтаў. Сакрамэнт не з’яўляецца магічным абрадам, але сустрэчай з Езусам Хрыстом,
які заўсёды побач з намі і суправаджае нас, - сказаў Францішак . Ён адзначыў, што
нас суправаджае таксама Святы Дух, Які вучыць нас таму, што не ведаем, і нагадвае
аб усім, чаму навучыў нас Езус. І, такім чынам, спрыяе таму, каб мы адчулі “прыгажосць
правільнага шляху”.
“Бог – Айцец, Сын і Дух Святы з’яўляюцца спадарожнікамі
нашага шляху, ствараюць гісторыю разам з намі”, - сказаў Папа. Ён дадаў, што Касцёл
цэлебруе гэта “з вялікай радасцю, у тым ліку і ў Эўхарыстыі”. “І калі Бог увайшоў
у нашу гісторыю, таксама і мы павінны крыху ўваходзіць у Яго гісторыю, ці, прынамсі,
прасіць Яго аб ласцы дазволу пісаць гісторыю разам з Ім, каб Ён пісаў нам нашу гісторыю”,
- завяршыў сваю гамілію Святы Айцец.