«Քիմիական Զէնքերուն Հարցով ՄԱԿ-ի Բանաձեւէն Չենք Մտահոգուած» Կ՛ըսէ Ասատ

Սուրիոյ նախագահ Պաշշար Ասատ չինական պետական պատկերասփիւռի կայանին հետ ունեցած հարցազրոյցի մը ընթացքին յայտնեց, որ ինք սուրիական քիմիական զէնքերուն հարցով Միացեալ Նահանգներու, Բրիտանիոյ եւ Ֆրանսայի` ՄԱԿ-ի Ապահովութեան խորհուրդին ներկայացուցած բանաձեւէն չի մտահոգուիր:
Ան ըսաւ, որ այդ երեք երկիրները այդ բանաձեւը ներկայացնելով «կը փորձեն միայն իրենց երեւակայական թշնամիին` Սուրիոյ դէմ պատերազմին մէջ իրենք զիրենք յաղթականի վերածել»:
Սուրիոյ նախագահը նաեւ նշեց, որ Չինաստան եւ Ռուսիա «ՄԱԿ-ի Ապահովութեան խորհուրդին մէջ Սուրիոյ դէմ զինուորական արարք գործելու որեւէ պատրուակ չմնալուն համար դրական դերակատարութիւն կ՛ունենան»:
Ասատ նշեց, որ Սուրիա տասնամեակներէ ի վեր քիմիական զէնքեր կ՛արտադրէ, որովհետեւ պատերազմական վիճակի մէջ գտնուող պետութիւն մըն է եւ բռնագրաւուած հողեր ունի` աւելցնելով, որ Սուրիոյ մօտ որոշ քանակի քիմիական զէնքեր կան, սակայն Սուրիոյ բանակը ինքզինք պատրաստած է աւանդական զէնքերով կռիւի: