Papa lutet për Pakistanin. Dy kamikazë vrasin 85 veta në një kishë në Peshavar
Para se të largohej nga Sardenja Papa bëri një thirrje të fuqishme për paqen dhe drejtoi
një ftesë për t’u lutur për viktimat e atentatit që ka goditur dje Kishën e të Gjithë
Shenjtërve në Peshavar, Pakistan. “Sot në Pakistan, si rrjedhojë e një zgjedhjeje
të gabuar, urrejtjes dhe luftës, është bërë një atentat e kanë vdekur 70 veta. Kjo
rrugë nuk shkon, nuk duhet. Vetëm udha e paqes, që ndërton një botë më të mirë. Por
nëse nuk e bëni ju, nëse nuk e bëni ju, nuk do ta bëjë dikush tjetër. Ky është problemi
e kjo është pyetja që ju lë unë: A jam i gatshëm, a jam e gatshme të nis një rrugë
për të ndërtuar një botë më të mirë? Vetëm kaq. E ta lusim Atin tonë për të gjithë
këta njerëz që kanë vdekur në këtë atentat në Pakistan.” Duke përfunduar, Papa
ka thënë: “Zoja na ndihmoftë gjithmonë, që të punojmë për një botë më të mirë,
që të ndërmarrim udhën e ndërtimit, udhën e paqes e kurrë udhën e shkatërrimit dhe
udhën e luftës.” Në Kishën e të Gjithë Shenjtërve në Peshavar të Pakistanit, në
përfundim të meshës, një atentat kamikaz i dyfishtë ka shkaktuar 85 të vdekur, ndër
të cilët shtatë fëmijë, e 145 të lënduar. Qeveria e provincës ka shpallur tri ditë
zie. Sot mijëra të krishterë, myslimanë e anëtarë të shoqërisë civile, në qytete
të ndryshme të Pakistanit, kanë zbritur në rrugë e nëpër sheshe në shenjë solidariteti,
si edhe për të kërkuar më shumë vëmendje e siguri nga ana e qeverisë. Edhe autoritetet
kombëtare e kanë dënuar me forcë këtë gjakderdhje. Sipas kryeministrit Navaz Sharif
terroristët nuk kanë fe. Të sulmosh të pafajshmit, - thotë një komunikatë e tij –
do të thotë të dalësh kundër urdhërimeve të Islamit dhe të të gjitha feve. Paul
Bhati, kryetar i pakicave dhe këshilltar i ministrit për Harmoninë, ka folur për “forca
të huaja” që qëndrojnë mbas gjakderdhjes dhe i ka kërkuar qeverisë t’u sigurojë pakicave
fetare një mbrojtje më të fortë . Ky, ka thënë Bhuti, “Është sulmi më i dhimbshëm
e më brutal që u bëhet të krishterëve në historinë e Pakistanit. Tashmë qeveria e
Pakistanit duhet të kuptojë se nuk mund të pritet më: ky është një sulm terrorist
e qeveria nuk është e aftë të mbrojë qytetarët. Jam shumë i shqetësuar, sepse në këtë
shoqëri nuk ka garanci për mbijetesë, nuk ka siguri. Nëse nuk ka pasur mundësi për
të mbrojtur një kishë, që është “zonë e kuqe” – meqë janë përcaktuar disa zona e kjo
është vlerësuar si “zonë e kuqe”, ku parashikohej se mund të ndodhte një gjë e tillë
– pra, nëse qeveria nuk ka arritur të mbrojë këtë kishë me rrezikshmëri të lartë,
do të thotë se nuk kishin qëllime të sinqerta për ta mbrojtur. Pra, qeveria është
e paaftë të mbrojë qytetarët e vet. Duke komentuar faktin se shumë njerëz kanë
protestuar në shenjë solidariteti përkundrejt viktimave, Paul Bhuti tha për mikrofonin
e Radio Vatikanit: “Kam marrë disa telefonata prej miqve të ndryshëm myslimanë, fetarë.
Tani jemi duke përgatitur një procesion të vogël në Islamabad dhe kam marrë disa telefonata
që më kanë komunikuar pjesëmarrjen e disa Imamëve të xhamive, të disa ushtarakëve
e pensionistëve që janë me ne e protestojnë kundër këtyre fakteve.