Papa Françesku: Fytyra e Krishtit në fëmijët e palindur e në të moshuarit, jeta është
e drejta e parë e njeriut
Çdo fëmijë, që abortohet, ka fytyrën e Zotit. Kështu tha sot Papa Françesku, duke
pritur në Sallën Klementina në Vatikan, rreth njëqind mjekë të Federatës Ndërkombëtare
të Shoqatave Mjekësore Katolike. Ata janë mbledhur në Romë deri më 22 shtator, për
Konferencën X ndërkombëtare me temë “Ungjillëzimi i ri, praktika obstetrike dhe kujdesi
për nënën”. Ati i Shenjtë u kërkoi atyre ta mbrojnë jetën, pa u lëkundur, duke luftuar
kulturën, që kërkon eliminimin e qenieve njerëzore, sidomos kur janë më të dobta fizikisht,
ose shoqërisht: “Çdo fëmijë i palindur, i dënuar padrejtësisht me abort, ka
fytyrën e Jezu Krishtit, ka fytyrën e Zotit, i cili akoma para se të lindë e pastaj,
i sapolindur, provon refuzimin e botës. E çdo i moshuar… megjithëse i sëmurë rëndë,
apo në ditët e fundit të jetës, mban në vetvete fytyrën e Krishtit. Nuk mund të hidhen,
siç propozon kultura e mbeturinave! Nuk mund të hidhen!” Siç thotë “Deklarata
për abortin” e Kongregatës për Doktrinën e Fesë, e drejta e parë e njeriut është e
drejta për jetën. Gjërat mund të shiten, por njerëzit kanë dinjitet, theksoi Papa,
vlejnë më shumë se sendet e nuk mund të kenë çmim. Për këtë arsye, mbrojtja e jetës
është një nga përparësitë e Magjisterit të Kishës Katolike. Në shoqërinë e sotme,
reflektoi Ati i Shenjtë me mjekët e pranishëm, janë bërë shumë përparime shkencore
në mjekësi, por, paradoksalisht, mjekët e kanë të vështirë të mbeten shërbëtorë të
jetës. “Çorientimi kulturor – shtoi Papa – ka prekur edhe një fushë, që dukej e paprekshme:
mjekësinë. Megjithëse, për natyrën e tyre, janë në shërbim të jetës, profesionet shëndetësore
detyrohen nganjëherë të mos e respektojnë atë”: “Kjo gjendje paradoksale shihet
në faktin se, ndërsa njeriut i jepen të drejta të reja, nganjëherë, edhe me pretendimin
e rremë se janë të drejta, jo gjithmonë mbrohet jeta si vlerë parësore dhe e drejtë
kryesore e çdo njeriu. Qëllimi i fundëm i veprimtarisë mjekësore mbetet gjithnjë mbrojtja
dhe promovimi i jetës”. Pastaj, Papa Françesku iu drejtua veçanërisht gjinekologëve: “Dikur,
gratë që ndihmonin gjatë lindjes, i quanim ‘si-nëna’, si të ishte një nënë njëlloj
si tjetra, si nëna e vërtetë. Edhe ju jeni ‘si-nëna’ e ‘si-baballarë’, edhe ju”. Por
ç’duhet të bëjnë mjekët katolikë në veçanti? Duhet të jenë gati për ta mbrojtur jetën
me çdo kusht: “Ky është impenjim i ungjillëzimit të ri, që shpesh ju kërkon
të ecni kundër rrymës, duke paguar personalisht një çmim të lartë. Zoti mbështetet
edhe në ju për të përhapur ‘ungjillin e jetës’”. Prandaj, vazhdoi Ati i Shenjtë,
repartet e gjinekologjisë, nëpër spitale, të kthehen në vende të privilegjuara dëshmie
e ungjillëzimi, sepse aty ku Kisha bëhet mjet për të dëshmuar praninë e Zotit të gjallë,
kontribuon në humanizimin e vërtetë të njeriut e të botës. Kështu, struktura shëndetësore
bëhet vend, ku mjekimi i njerëzve nuk është zanat, por mision: “Nuk ekziston
ndonjë jetë njerëzore më e shenjtë se tjetra, ashtu si nuk ekziston ndonjë jetë njerëzore,
që ka më tepër kuptim se tjetra, nga pikpamja cilësore. Besueshmëria e sistemit shëndetësor
nuk matet vetëm me efikasitetin e tij, por sidomos me kujdesin e dashurinë për njerëzit,
jeta e të cilëve është gjithnjë e shenjtë dhe e padhunueshme”.