Գերապայծառ Տոմինիք Մամպերթիի Ելոյթը ''Հիւլէական Ուժանիւթի Միջազգային Գործակալութեան''
57-րդ Խորհրդաժողովին։
Անցեալ 16 սեպտեմբերին, Վիէննայի մէջ կայացած, Հիւլէական Ուժանիւթի Միջազգային Գործակալութեան
57-րդ Խորհրդաժողովի ընթացքին ունեցած իր ելոյթին մէջ, Վատիկանի արտգործ նախարար` գերապայծառ
Մամպերթի յայտնած է Սուրբ Աթոռի գոհունակութիւնը ի տես Գործակալութեան տարած աշխատանքին,
աշխարհի ընտանիքի կեանքի բարելաւման ի սպաս։ Գերապայծառ Մամպերթին ապա անդրադարձած
է ֆրանչիսկոս Քահանայապետի Երիտասարդութեան համաշխարհային 28-րդ օրուայ առթիւ Պրազիլ
կատարած այցելութեան ընթացքին, Մարկինիոսի ֆավէլայի մէջ արտասանած խօսքին մէջ ուղղած
կոչին` ''գործելու աւելի արդար եւ աւելի զօրակից աշխարհի մը համար, ի սպաս այն մշակոյթին
որ մերձաւորին մէջ չի տեսներ մրցակից մը կամ թիւ մը, այլ եղբայր մը''։ Այս խօսքերէն
մեկնելով - ըսած է Վատիկանի դիւանագէտը - կ՛ուզեմ գնահատել Գործակալութեան ''թէխնիքական''
համագործակցութեան աշխատանքը ի նպաստ կարիքաւորներուն, հիմնուած այն համոզումի վրայ որ
ամէն մարդ էակի բարօրութիւնը պէտք է հանդիսանայ գիտական եւ զարգացումի հետազօտական աշխատանքի
կեդրոն եւ ոչ թէ այլ նպատակներ հետապնդելու համար միջոց։ Գերապայծառ Մամպերթի ապա
վերյիշած է երանելի Յովհաննէս ԻԳ Քահանայապետի ''Խաղաղութիւն Երկրի Վրայ - Pacem in
terris '' շրջաբերական թուղթի 50-րդ ամեակը ընգծելով անոր պարունակութեան արդիականութիւնը
ու ապա վերահաստատած է Սուրբ Աթոռի կամքը հիւլէական զէնքերու ոչնչացումի գծով ու կոչ
ուղղած է կառավարիչներուն վերջ դնելու միջուկային զէնքերու արտադրութեան եւ հիւլէական
արտադրութիւնը սահմանափակելու խաղաղասէր նպատակներու համար։
Վատիկանի արտգործ
նախարարը հուսկ յայտնած է Սուրբ Աթոռի խոր մտահոգութիւնը Միջին Արեւելքի մէջ ապրուած
ողբերգրական կացութեան, վերահաստատելով թէ ''որեւէ հարց կարելի է լուծել դիւանագիտական
ճանապարհներ օգտագործելով''։
Գերապայծառ Մամպերթին խօսքը եզրափակած է հրաւէր
ուղղելով վերատեսել առաջնահերթութիւններն ու արժէքները որոնց հիման վրայ կերտել բարոյական,
մշակութային եւ տնտեսական զարգացումը, որովհետեւ - ընգծած է Ան - զարգացումը, զօրակցութիւնն
ու արդարութիւնը ուրիշ բան չեն եթէ ոչ խաղաղութեան արժէքներ, խաղաղութիւն մը որ ըլլալու
տեւողական ու մնայուն։