Прысутнасць Касцёла ў сацыяльных сетках абмяркуюць у Ватыкане
У стылі камунікацыі
папы Францішка можна вылучыць чатыры галоўныя рысы: простыя словы, змест, які глыбока
кранае сэрцы вернікаў, жэсты і выкарыстанне вобразнай мовы. Гэтымі назіраннямі падзяліўся
ў інтэрв’ю “L’Osservatore Romano” арцыбіскуп Клаўдыё Марыя Чэлі, старшыня Папскай
рады па сродках масавай камунікацыі. Паводле іерарха, словы Святога Айца вельмі лёгкія
для разумення, яны адказваюць на пакуты і ўнутраны пошук чалавека незалежна ад яго
поглядаў ці веравызнання. Акрамя таго, Папа кажа не пра ўсе рэчы – ён робіць жэсты,
якія здольныя перадаваць унутранае багацце звязанае з глыбокай духоўнасцю. Нарэшце,
Францішак карыстаецца простымі выразамі, каб перадаць складаныя паняцці. “Хто не памятае,
напрыклад, яго закліку да святароў і біскупаў, мець “запах авечак”?”, - адзначыў арцыбіскуп
Чэлі.
Іерарх расказаў, што 19-21 верасня ў Ватыкане адбудзецца пленарная асамблея
Папскай рады па сродках масавай камунікацыі. У цэнтры разважання яе ўдзельнікаў будзе
сувязь паміж “сеткай і Касцёлам”. Арцыбіскуп нагадаў, што менавіта сацыяльныя сеткі
былі галоўнай тэмай апошняга паслання Бэнэдыкта XVI на Сусветны дзень масавай камунікацыі.
У ім Пантыфік падкрэсліў іх пазітыўны характар і заклікаў да евангелізацыйнай прысутнасці
Касцёла ў вэб-прасторы. Паводле арцыбіскупа Чэлі, падчас пленарнай асамблеі будуць
абмяркоўвацца пытанні кшталту: як прысутнічаць у сацыяльных сетках? З якімі пасланнямі?
З якімі стылем камунікацыі?
Іерарх падзяліўся, што галоўным чынам, у цэнтры
ўвагі ўдзельнікаў сустрэчы будзе праца мультымедыйнага парталу www.news.va, а таксама
яго старонкі ў “Фэйсбук”. Паводле арцыбіскупа Чэллі, публікацыі партала ў гэтай сацыяльнай
сетцы дасягаюць каля 10 млн. чалавек у месяц, якія маюць магчымасць пакідаць свае
каментары: як пазітыўныя, так і негатыўныя.
Арцыбіскуп Чэлі адзначыў, што самымі
папулярнымі постамі партала news.va з’яўляюцца тыя, якія ўтрымліваюць багаты духоўны
змест – вытрымкі з прамоваў Папы і Айцоў Касцёла.