Папа сустрэўся з арцыбіскупам Краеўскім і яго блізкімі
18 верасня папа Францішак
прыняў на аўдыенцыі арцыбіскупа Конрада Краеўскага – новага Апостальскага элемазінарыя,
а таксама яго сваякоў і блізкіх. У сустрэчы прынялі ўдзел каля 20 чалавек. 17 верасня,
у базыліцы св. Пятра, іерарх атрымаў біскупскую сакру з рук кардынала Джузэпэ Бэртэла,
кіраўніка Губернатарата Ватыкана. На цырымонію нечакана прыбыў таксама і папа Францішак.
Менавіта ён, 3 жніўня абвясціў аб рашэнні прызначыць Конрада Краеўскага Апостальскім
элемазінарыем і надаць яму годнасць арцыбіскупа. Да гэтага часу ён быў адным з папскіх
цырымонімайстраў і афіцыялам папскіх літургічных цэлебрацыі. Нягледзячы на такія высокія
пасады, іерарх нерэдка асабіта займаўся дапамогай бедным. Разам з законніцамі ён часта
раздаваў ежу і прадукты бедным, якія збіраліся каля Ватыкана.
У абавязкі Апостальскага
элемазінарыя ўваходзіць клопат пра бедных ад імя Папы. Таксама, ад імя Святога Айца
ён мае магчымасць ўдзяляць Апостальскае благаслаўленне вернікам у сувязі з адмысловымі
ўрачыстасцямі. Элемазінарый застаецца на сваёй пасадзе нават калі наступае перыяд
“sede vacante” разам з Вялікім Пенітэнцыярыем і кардыналам-камерленга.
Конрад
Краеўскі нарадзіўся ў 1963 г. у Лодзі. Тут ён закончыў духоўную семінарыю, а затым
працягнуў вучобу ў Рыме: у Папскім літургічным інстытуце і Папскім універсітэце св.
Тамаша з Аквіну. З 1998 г. працаваў у Папскай службе літургічных цэлебрацый. Сваім
біскупскім дэвізам Конрад Краеўскі выбраў адно слова – “Міласэрнасць”.