OSBE-ja kërkon kontribut më vendimtar nga komunitetet fetare të Kosovës për përforcimin
e respektit e të mirëkuptimit të anasjelltë ndërmjet qytetarëve të përkatësive të
ndryshme fetare. Liderët dhe pjesëtarët e komunitetit islam, ortodoks serb, katolik,
protestant dhe hebraik u mblodhën më 17 shtator në një konferencë të organizuar nga
OSBE në Prishtinë me temë dialogun ndërfetar për të diskutuar çështjet e përbashkëta
që preokupojnë komunitetet fetare në Kosovë. Pjesëmarrësit nënvizuan diversitetin
fetar dhe nivelin e konsiderueshëm të tolerancës fetare në Kosovë si dhe rolin e rëndësishëm
që kanë liderët fetarë në forcimin e respektit dhe mirëkuptimit në mes të komuniteteve
të ndryshme në Kosovë. Ata bënë thirrje për një kornizë ligjore të përmirësuar
për lirinë e fesë, e cila do tu mundësonte të regjistrohen si persona juridik, të
kërkojnë kthim të pronës dhe t’i rregullojnë financat e tyre. “Unë i përgëzoj liderët
fetarë për gatishmërinë dhe përpjekjet e tyre për të ndihmuar në promovimin e tolerancës
fetare dhe ndëretnike në Kosovë,” tha Ambasadori Jean Claude Schlumberger, Shef i
Misionit të OSBE-së në Kosovë.
“Liria e mendimit, ndërgjegjes, fesë dhe besimit
janë me të vërtetë të drejta themelore që kërkojë mbrojtje gjithëpërfshirëse në çdo
shoqëri moderne. OSBE është e gatshme të vazhdojë të përkrahë komunitetet fetare në
përpjekjet për të përmirësuar pozitën e tyre ligjore dhe të vazhdojë të kontribuojë
për dialog dhe pajtim në mes të komuniteteve.” Konferenca u mbajt pas një serie
të 15 forumeve ndërfetare në nivel lokal të organizuara nga OSBE në gjashtë muajt
e fundit. Misioni i OSBE-së në Kosovë ka për mandat mbrojtjen dhe promovimin e
të drejtave të njeriut dhe të komuniteteve, demokratizimin dhe zhvillim e sektorit
të sigurisë publike. Kështu njofton Organizata për Siguri e Bashkë-punim në Evropë.