Յառաջիկայ 16 Սեպտեմբերին ֆրանչիսկոս Քահանայապետը Իր Առաջին Հանդիպումը Պիտի Ունենայ Հռոմի Թեմի Կղերին Հետ։

''Երկուշաբթի 16 սեպտեմբերին առաւօտեան ժամը 10-ին ֆրանչիսկոս Քահանայապետը իր առաջին հանդիպումը պիտի ունենայ Հռոմի կղերին հետ, շուրջ 1500 կուսակրօն քահանաներ, ս. Յովհաննէս տաճարին մէջ պիտի համախմբուին հանդիպելու համար Քահանայապետին'', կը հաղորդագրէ Հռոմի թեմը։

Ի պատրաստութիւն այս հանդիպումին Նորին Սրբութիւնը իր տեղապահ Արքեպսիկոպոս կարտինալ Ակոսդինօ Վալինիէն խնդրած է որ կղերին բաշխէ 2008-ին իր ուղղած պատգամը Արժանթինի կղերին։ Այդ պատգամին մէջ Նորին Սրբութիւնը քահանաները կը ներկայացնէ որպէս ''սիրալիր աշակերտներ'' ու ''եռանդուն առաքեալներ'' զգուշացնելով զանոնք լոկ պաշտօնեաներ դառնալէ։

Յայտնենք որ Հռոմի կղերի տարեկան հանդիպումը իրենց եպիսկոպոսին հետ տեղի կ'ունենայ քառասնորդացի առաջին հինգշաբթի օրը։ Այս տարի Պենետիկտոս ԺԶ Քահայանապետը նախքան իր հրաժարականը` 14 փետրուարին, հանդիպում ունեցաւ իր կղերին հետ Պօղոս Զ. սրահին մէջ եւ որուն ընթացքին անպատրաստից երկրար ճառ մը արտասանեց նուիրուած` Վատիկանեան Տիեզերական Բ Ժողովի տարիներուն (1962-1965)։ Պենետիկտոս Վաստակաւոր Քահանայապետը այդ առթիւ իր խօսքը եզրափակած էր ըսելով ''նոյնիսկ հրաժարականէս ետք, ձեզի հետ կը մնամ աղօթքի միութեամբ եւ վստահ եմ որ դուք ալ նոյնը պիտի ընէք''։