Մոսկուայի Ու Համայն Ռուսիոյ Պատրիարքի Նամակը ԱՄՆի Նախագահին։
''Միջազգային ահաբեկիչներ, աւազակախումբեր, օտար վարձաւորներ կը գործեն Սուրիոյ
մէջ''։ Մոսկուայի ու համայն Ռուսիոյ Կիւրեղ Պատրիարքը պատգամ մը ուղղած է
ԱՄՆի նախագահ Օպամային խնդրելով որ հրաժարի Սուրիոյ դէմ զինեալ յարձակում կատարելէ եւ
դիմելու դիւանագիտական միջոցներու, Սուրիոյ տագնապի լուծման համար, այժմ որ Սուրիոյ կառավարութիւնը
պատրաստակամութիւն ցոյց տուած է իր քիմիական զէնքերը Միջազգային հսկողութեան տակ դնելու։
Կիւրեղ Պատրիարքը կը զգուշացնէ նախագահ Օպաման հաստատելով որ ներկայիս Սուրիոյ մէջ
զինեալ տագնապը հետեւանքն է միջազգային ահաբեկիչներու, աւազակախումբերու, օտար վարձաւորներու
մասնակցութեան։ Խաղաղասէր միլիոնաւոր սուրիացիներուն համար զինեալ ընդհարումը դարձաւ
առօրեայ Գողգոթա մը։ Մալուլա քրիստոնեայ քաղաքի բռնագրաւումը ընդդիմութեան կողմէ կը հաստատէ
մեր համոզումը միջազգային ահաբեկիչներու ներկայութեան մասին - կը գրէ Պատրիարքը ու ապա
իր պատգամի աւարտին կը մատնանշէ ռուս օրթոտոքս եկեղեցւոյ 20-րդ դարուն կրած հալածանքներուն,
երկու աշխարհամարտերու հետեւանքով ու անեւ ԱՄՆի ժողովուրդին, 11 սեպտեմբեր 2001-ին, կրած
ահաբեկիչներու հրեշային յարձակումին ։