Францішак: пляткарства – гэта злачынства, якім забіваем Бога і бліжняга
Хто кажа кепска пра
бліжняга – крывадушнік, які не мае “адвагі глядзець на ўласныя недахопы”. З такімі
словамі папа Францішак звярнуўся да вернікаў прысутных на св. Імшы ў капліцы Дома
св. Марты 13 верасня. Паводле Пантыфіка, пляткарства – мае “злачыннае вымярэнне”,
таму што кожны раз калі кажам блага пра нашых братоў, паўтараем забойчы ўчынак Каіна.
Святы Айцец паразважаў над словамі Езуса: “Чаму бачыш шчэпку ў воку брата свайго,
а бервяна ў сваім воку не заўважаеш?”. Ён падкрэсліў, што Хрыстус кажа пра нянавісць
і асуджэнне ў адносінах да бліжняга, а гэтыя словы актуальны для людзей усіх эпохаў.
“Тыя, хто жывуць асуджаючы бліжняга, кажучы кепска аб ім – крывадушнікі, бо не маюць
сілы, адвагі, каб паглядзець на ўласныя недахопы. Пан не кажа аб гэтым шмат словаў.
Затым, яшчэ наперадзе, Ён скажа, што той, хто мае ў сэрцы нянавісць да бліжняга –
забойца... Таксама і апостал Ян, у сваім Першым Пасланні, кажа аб гэтым ясна: той,
хто ненавідзіць брата, ходзіць у цемры; хто асуджае брата, ходзіць у цемры”, - падкрэсліў
Святы Айцец.
Паводле Францішка, кожны раз, калі мы асуджаем братоў у нашым
сэрцы, ці яшчэ горш – калі кажам аб гэтым іншым – становімся хрысціянамі-забойцамі.
“Хрысціянін-забойца...
Гэта не я кажу, а Пан. І тут няма месца для розных нюансаў. Калі ты кажаш кепска пра
брата – забіваеш яго. І мы, кожны раз, калі так робім, паўтараем жэст Каіна, першага
забойцы ў гісторыі”, - адзначыў Пантыфік.
Францішак звярнуў увагу на яшчэ адзін
важны аспект: у наш час, калі так шмат гаворыцца пра войны і гучаць заклікі аб міры,
“неабходны жэсты нашага навяртання”. Ён чарговы раз падкрэсліў, што “пляткарства не
бывае нявінным”, а мова нам дадзена, каб славіць Бога. “Але калі ўжываем мову, каб
казаць кепска пра братоў і сясцёр – ужываем яе, каб забіваць Бога” – “вобраз Бога
ў бліжнім”. Папа заклікаў прасіць Езуса аб ласцы навяртання да любові, пакоры, сціпласці,
клопату аб іншым і велікадушнай любові да бліжняга.