Светиот Отец се сретна со премиерката на Тајланд

Во четврток 12 септември папата Фрањо ја прими на аудиенција тајландската премиерка Јинглук Шинаватра, која потоа се сретна со државниот секретар, кардинал Тарчизио Бертоне и архиепископот Доминик Мамберти, секретар за односи со државите. За време на срдечниот разговор – како што стои во соопштението на канцеларијата за печат при Светата Столица – се истакнати добрите односи помеѓу Тајланд и Светата Столица, како и слогата и соработката помеѓу Црквата и државата, и тоа посебно на воспитно и социјално поле. Освен тоа станало збор и за некои актуелни меѓународни теми, како и за политичката состојба на Азискиот континент, со посебен осврт на важноста на меѓукултурниот и меѓурелигискиот дијалог при промовирање на човековите права, мир и праведност – се истакнува во соопштението од канцеларијата за печат при Светата Столица.

РВ/го*ко