Të rinjtë janë e sotmja dhe e ardhmja e njerëzimit. S’ka dyshim se rinia përfaqëson
thesarin më të çmuar për çdo popull, vend e bashkësi. Kisha katolike, nga ana saj,
u kushton të rinjve një vëmendje tejet të veçantë, me të cilët punon, bashkëpunon
e ndërton formimin e tyre njerëzor, shpirtëror e kulturor-shoqëror. Një ndër shenjat
e vëmendjes e të dashurisë së Kishës katolike ndaj të rinjve, mes tjerash, është edhe
Dita Botërore e Rinisë, që mbahet në vende të ndryshme të botës, kujtojmë sivjet,
në korrikun e kaluar, u mbajt në Rio de Zhanjero të Brazilit. Tema kryesore që karakterizoi
këtë takim botëror të rinisë qe një fjali marr nga Ungjilli i Mateut: “Shkoni e bëni
nxënës apo dishepuj të ri të gjithë popujt!” (krh Mt 28,19). Po që të rinjtë e krishterë
të arrijnë ta bëjnë këtë, duhet të besojnë, të jenë të fortë e të rrënjosur në fe,
temë që ishte në qendër të takimit të mëparshëm botëror të rinisë, mbajtur në Madrid.
(Të rrënjosur dhe të themeluar apo të mbështetur në Krishtit, të fortë në fe” (krih
Kol, 2,,7) nga letra e shën Palit drejtuar Kolosianëve. Pika qendrore, themeli
i fesë së krishterë, këndej pik referimi i jetës dhe veprimit të besimtarit të krishterë
është vetëm e vetëm Jezu Krishti, siç pohoi sot edhe Papa Françesku gjatë homelisë
së Meshës. Kjo ftesë është tejet aktuale. Po kalojmë një periudhë historike shumë
të veçantë: përparimi teknik na ka ofruar e na ofron mundësi të panumërta ndërveprimi
mes njerëzve dhe popujve, por globalizimi i këtyre marrëdhënieve do të jetë pozitiv
e do të bëjë që bota të jetë më e njerëzishme vetëm nëse do të themelohet e mbështetet
jo mbi materializmin, por mbi dashurinë, i vetmi realitet që është në gjendje ta mbushë
zemrën e secilit dhe t’i bashkojë njerëzit. Hyji është dashuri. Njeriu që e harron
Zotin është pa shpresë dhe e humb aftësinë për ta dashur të afërmin. Prandaj, është
urgjente që ta dëshmojmë praninë e Hyjit derisa secili njeri të mund ta provojë këtë
thesar të bukur: është në lojë shëlbimi i njerëzimit dhe shëlbimi i secilit prej nesh.
Kushdo që e kupton këtë domosdoshmëri, nuk bën tjetër gjë veçse së bashku me shën
Palit pohon «I mjeri unë nëse nuk e shpall Ungjillin!» (1 Kor9,16). Po çfarë
marrëdhënie kanë me fenë të rinjtë, posaçërisht të rinjtë shqiptarë, në
realitetin e sotëm. A mos ndoshta duket se ka një largim të tyre nga besimi dhe pjesëmarrje
në kremtimet e riteve fetare, apo vijon të ruhet tradita familjare për të trashëguar
kulturën fetare? Siç dihet, Shqipëria kaloi një periudhë të gjatë, gati gjysmëshekullore,
larg besimit, dhe sigurisht që sistem komunist ateist la gjurmët e veta në ndërgjegjet
e njerëzve. Gjithsesi, pas viteve ’90 me rënien e diktaturës e rifitimin e lirisë
së fjalës, të lirisë fetare e të demokracisë, në Shqipëri vërehet një rritje e ndërgjegjësimit
të popullsisë në raport me besimin dhe numri i të rinjve që praktikojnë mësimet e
fesë e ritet fetare është në rritje. Nga ana tjetër, paralel me këtë, për shkak të
tranzicionit dhe moskuptimit siç duhet, të lirisë, në një pjesë të rinisë, edhe veset
e fenomenet negative kanë pasur një rritje. Prandaj mendojmë që takimet e të rinjve
besimtarë në momente e në vende të ndryshme luajnë një rol pozitiv në formimin e të
rinjve. Kisha, për vazhdimin e këtij misioni të ungjillëzimit, llogarit edhe
në të rinjtë. Ata janë misionarët e parë në mesin e bashkëmoshatarëve të tyre!
Në fund të Koncilit të dytë Ekumenik të Vatikanit, 50-vjetorin e të cilit e kremtojmë
këtë vit, Shërbëtori i Hyjit, Papa Pali VI, u dorëzoi të rinjve dhe të rejave të mbarë
botës një Mesazh që hapej me këto fjalë: “është pikërisht juve, të rinj e të reja
të botës mbarë, që Koncili dëshiron t’jua drejtojë mesazhin e tij të fundit. Sepse
jeni ju ata që do ta merrni pishtarin nga duart e etërve tuaj dhe do ta jetoni në
botë në momentin e shndërrimeve më gjigande të historisë së saj. Jeni ju që, duke
mbledhur më të mirën nga shembulli dhe nga mësimi i prindërve dhe mësuesve tuaj, do
ta formoni shoqërinë e nesërme: ju do të shëlboheni ose do të birreni me të”. Dhe
e mbyllte Papa me një thirrje: “Ndërtoni në entuziazëm një botë më të mirë se kjo
e tanishmja!” (Porosia drejtuar të rinjve, 8 dhjetor 1965). Po t’i kthehemi
bisedës së marrëdhënies që të rinjtë kanë me fenë, për çka flasim me priftin shqiptar
dom Marjan Palokën....