Rubrika “Te gurra e besimit”: “Përdorimi i dyfishtë i arsyes”!
Dy mënyrat e përdorimit të arsyes, në emisionin XXII të rubrikës “Te gurra e besimit”
tema “Përdorimi i dyfishtë i arsyes”. Vërejmë se arsyeja mund të përdoret në
dy mënyra. E dy janë edhe mënyrat, që të bëjnë të ditur ose të paditur, të madh, ose
të vogël. Njëra nga mënyrat e përdorimit të arsyes, është ajo që synon pavarësinë
e plotë, që vihet mbi Zotin në gjithë shtrirjen e shkencave, duke filluar nga ato
natyrore, në të cilat metoda e përshtatshme për kërkimin e materies, universalizohet:
për këtë metodë, Zoti nuk ekziston. E kështu, në fund të fundit, edhe në teologji:
peshkohet në ujërat e Shkrimit Shenjt me një rrjetë, që mund të zërë vetëm peshq të
njëfarë mase. E kur peshku e kalon këtë masë, nuk hyn më në rrjetë, prej këndej, nuk
mund të ekzistojë. Kështu misteri i madh i Jezusit, Birit të Hyjit që u bë njeri,
rrëgjohet në Jezusin historik: në një figurë tragjike; fantazëm, pa mish e pa eshtra;
njeri, që mbeti në varr, që vdiq e u kalb me të vërtetë. Metoda di t’i zërë ca lloj
peshqish, por e përjashton misterin e madh, sepse njeriu bëhet vetë masë dhe ka mendjemadhësinë,
njëkohësisht, edhe marrëzinë, të absolutizojë disa mënyra veprimi të papërshtatshme
për realitetet e mëdha; hyn në atë frymë akademike, që e kemi parë tek skribët, të
cilët iu përgjigjen Mbretërve Dijetarë me fjalët: “Nuk më përket mua, unë jam i mbyllur
në jetën time, që nuk duhet çikur”. Jemi para specializimit i cili, duke i vërejtur
të gjitha hollësirat, nuk arrin më të shikojë të tërën. Por ka edhe një mënyrë
tjetër për ta përdorur arsyen, për të qenë i ditur: është mënyra e njeriut, që e njeh
vetveten, e di kush është, pranon masën e vet e madhështinë e Hyjit, duke hyrë, me
përvujtëri, në risitë e veprimit të Zotit. Kështu, pikërisht duke pranuar vogëlsinë
njerëzore, duke u bërë i vogël, siç është në të vërtetë, njeriu arrin tek e vërteta.
Në këtë mënyrë edhe arsyeja arrin t’i shfrytëzojë të gjitha mundësitë e veta, nuk
shuhet, përkundrazi, zgjerohet, bëhet gjithnjë më e madhe.