Ці мы любім Касцёл
як уласную маці, умеючы разумець яе недахопы? Ці дапамагаем яму быць больш прыгожым,
больш адпаведным Пану? З такімі пытаннямі 11 верасня папа Францішак звярнуўся да
вернікаў сабраных на плошчы св. Пятра падчас традыцыйнай агульнай аўдыенцыі. Сваю
катэхезу Святы Айцец прысвяціў разважанню над сцвярджэннем змешчаным у дагматычнай
канстытуцыі “Lumen gentium”, аб тым, што Касцёл – наша маці ў веры і ў звышнатуральным
жыцці. “Гэты вобраз з’яўляецца найбольш ужываным Айцамі Касцёла ў першыя стагоддзі
і я думаю можа быць карысным таксама для нас. У якім сэнсе Касцёл з’яўляецца маці?”,
- спытаў Пантыфік. “Перш за ўсё маці нараджае жыццё, носіць сваё дзіця ва ўлонні на
працягу дзевяці месяцаў, а затым адкрывае яго на жыццё, нараджаючы яго. Таксама і
Касцёл: нараджае нас у веры, праз дзейнасць Святога Духа, які робіць яе плённай, на
падабенства Панны Марыі”, - сказаў Папа.
Францішак адзначыў: “канешне, вера
– гэта асабісты акт (...) але веру я атрымліваю ад іншых, у сям’і, супольнасці, якая
вучыць мяне казаць “я веру”, “мы верым”. “Хрысціянін – гэта не востраў! Мы не становімся
хрысціянамі ў лабараторыі, не становімся хрысціянамі ў адзіноце, дзякуючы нашым сілам,
вера – гэта падарунак, дар Бога, які даецца Касцёлам і праз Касцёл. А Касцёл дае нам
веру праз хрост: гэта момант калі мы нараджаемся як дзеці Божыя, момант, калі нам
даецца жыццё Божае, ён нас нараджае, як маці”, - сказаў Святы Айцец.
Паводле
Папы сувязь якая існуе паміж Касцёлам і вернікамі з’яўляецца глыбокай і жыццёвай.
“Наша прысутнасць у Касцёле – гэта не знешні і фармальны акт, (...) але ўнутраны і
жыццёвы; да Касцёла нельга належаць як да суполкі, партыі ці якой-небудзь арганізацыі.
Сувязь – жыццёвая, як тая, якую маем з уласнай маці, бо як сцвярджае св. Аўгустын:
“Касцёл – гэта сапрадная маці хрысціян”, - адзначыў Пантыфік.
Францішак падкрэсліў,
што “маці не абмяжоўваецца толькі тым, што дае жыццё, але з вялікім клопатам дапамагае
сваім дзецям расці, дае ім малако, насычае іх, вучыць жыццёваму шлях, заўсёды суправаджае
з увагай, цяплынёй, любоўю, нават калі яны вялікія”. “У гэтым яна ўмее папраўляць,
прабачаць, разумець, здольная быць блізка ў хваробе, пакутах. Адным словам, добрая
маці дапамагае дзецям выйсці па-за сябе, не прыбываць камфортна пад матчынымі крыламі,
як вывадак куранятаў пад крыламі куры. Касцёл, як добрая маці робіць тое самае: суправаджае
наш рост перадаючы Слова Божае, якое з’яўляецца святлом, што ўказвае шлях хрысціянскага
жыцця; удзяляючы сакрамэнты”, - сказаў Папа.
Святы Айцец заклікаў адказаць
на пытанне – якія адносіны маю з Касцёлам? Ці адчуваю, што ён з’яўляецца маці, якая
дапамагае ў хрысціянскім росце? Ці ўдзельнічаю ў жыцці Касцёла, адчуваю сябе яго часткай?
Мае адносіны з ім фармальныя ці жыццёвыя?
Францішак звярнуў увагу яшчэ на адзін
важны аспект: Касцёл, акрамя таго, што з’яўляецца маці хрысціян, таксама і складаецца
з хрысціян. “Касцёл гэта не нешта адрознае ад нас, але ён павінен разглядацца як поўня
хрысціян, як “мы” хрысціян: я, ты, усе мы з’яўляемся часткай Касцёла (...) Мацярынствам
Касцёла жывём мы ўсе: пастыры і вернікі (...) Касцёл гэта не толькі святары – гэта
ўсе мы (...) Мы ўсе пакліканы супрацоўнічаць у нараджэнні ў веры новых хрысціян, мы
ўсе пакліканы быць выхаваўцамі ў веры, абвяшчаць Евангелле”, - сказаў Папа.
На
заканчэнне катэхезы Францішак заклікаў кожнага верніка адказаць для сябе: што раблю
для таго, каб падзяліцца з іншымі верай? Ці я плённы ў маёй веры ці закрыты? “Будзем
усе ўдзельнічаць у мацярынстве Касцёла, каб святло Хрыста дасягнула самых крайніх
межаў зямлі”, - заклікаў Святы Айцец.