Զինուորական Պատրաստութիւններ

Սպիտակ տունէն աղբիւր մը ամերիկեան ազդեցիկ «Նիւ Եորք Թայմզ» օրաթերթին յայտնած է, որ Օպամա Փենթակոնէն կը պահանջէ աւելցնել ամերիկեան եւ ֆրանսական ուժերու կողմէ Սուրիոյ հարուածի թիրախներու թիւը, ինչպէս նաեւ ուսումնասիրել այդ հարուածներուն մէջ օդուժին հաւանական մասնակցութեան հարցը:
Խօսքը ընդլայնման մասին է ֆրանսացի զինուորականներու նախապէս կազմած ցուցակին, որ 50 սուրիական թիրախներ կ՛ընդգրկէր: Միեւնոյն ժամանակ, անկանխատեսելի հետեւանքներէ զգուշանալու համար կը նախատեսուի խուսափիլ քիմիական զէնքի ենթադրեալ պահեստանոցները հարուածելէ, երբ քիմիական զէնքի օգտագործումը դարձած է զինուորական գործողութիւն սկսելու պատճառ: Ամերիկեան բանակի սպայակոյտի պետ Մարթին Տեմփսի յայտարարած է, որ հաւանական թիրախներու շարքին են հակաօդային պաշտպանութեան կեդրոնները:
Միացեալ Նահանգներու պաշտպանութեան նախարար Չաք Հէյկըլ Քոնկրեսի անդամներուն յայտնեց, որ Սուրիոյ դէմ զինուորական սահմանափակ հարուածը հաւանաբար տասնեակ միլիոնաւոր տոլարներ պիտի արժէ: Կը հաղորդուի, որ իւրաքանչիւր 1600 քիլոմեթր հասողութիւն ունեցող «Թոմահոք» տիպի հրթիռ 1.2-1.5 միլիոն տոլար կ՛արժէ, իսկ ռատարներու վրայ չերեւցող «Պի.2» օդանաւի թռիչքի իւրաքանչիւր ժամը 60 հազար տոլար կ՛արժէ: Այդ օդանաւերը կրնան 18 ժամ թռիչք կատարել, ապա վերադառնալ իրենց ռազմակայանները:
Կը նշուի, որ ամերիկեան ծովուժը 2011-ին Լիպիոյ դէմ 221 «Թոմահոք» արձակած է: Եթէ Սուրիոյ դէմ նոյնքան թիւով «Թոմահոք» օգտագործուի, ապա ատիկա աւելի քան 100 միլիոն տոլար կրնայ արժել:
Հակառակ այս բոլորին, Փենթակոնի բանբերը յայտնեց, որ «այս հարցը Միացեալ Նահանգներու ազգային ապահովութեան շահերուն կը վերաբերի… երբ հարցը այսքան կարեւոր է, ծախսը հոգալու ձեւը պիտի գտնենք»:
«Մայատին» կը հաղորդէ, որ Միացեալ Նահանգներու արտաքին գործոց նախարարութեան մօտ Ատանայի մէջ ամերիկեան հիւպատոսարանի մէջ իր դիւանագիտական ներկայութիւնը նուազեցնելու ուղղուածութիւն մը գոյութիւն ունի:
Ռուսական աղբիւրներ կը յայտնեն, որ 1500 արտասահմանցի մասնագէտներ Սուրիա կը գտնուին` առ ի պատրաստութիւն ամերիկեան յարձակումին:
Մոսկուա երէկ մտահոգութիւն յայտնեց «Սուրիոյ մէջ քրիստոնեաներու գոյութեան խորհրդանիշ Մաալուլայի դէմ ահաբեկիչներու յարձակումին» առնչութեամբ:
Ռուսիա նաեւ Միացեալ Նահանգները զգուշացուց Սուրիոյ մէջ քիմիական զէնքերու պահեստանոցները հարուածելէ