Ներկայացուցիչներու Տան Նախագահը Կը Զօրակցի Օպամայի Պահանջին

Օպամա Քոնկրեսէն Կը Պահանջէ Սուրիոյ Դէմ Որդեգրուելիք Միջոցառման Շուրջ Անմիջապէս Քուէարկութիւն Կատարել

Միացեալ Նահանգներու նախագահ Պարաք Օպամա երէկ յայտնեց, որ ինք վստահ է, թէ Քոնկրեսը ի նպաստ Սուրիոյ դէմ ամերիկեան զինուորական միջոցառման պիտի քուէարկէ, եւ թէ Միացեալ Նահանգներ Սուրիոյ նախագահ Պաշշար Ասատի ուժերը պարտութեան մատնելու համար զինեալ ընդդիմութեան օգնելու աւելի լայն ծրագիր մը ունին:
Սպիտակ տան մէջ քոնկրեսական ղեկավարներու հետ հանդիպումի մը ընթացքին Օպամա Քափիթըլ Հիլին կոչ ուղղեց Սուրիոյ հարցով անմիջական քուէարկութիւն մը կատարելու եւ վերահաստատեց, որ ամերիկեան հարուածը սահմանափակ պիտի ըլլայ եւ ոչ թէ Իրաքի եւ Աֆղանիստանի պատերազմներու կրկնութիւն մը:
«Մենք սահմանափակ բան մը կը պատկերացնենք: Ատիկա համաչափ բան մըն է: Ասատի կարողականութիւնը պիտի նուազեցնէ», ըսաւ ան` աւելցնելով, որ «նոյն ատեն ունինք աւելի ընդարձակ ռազմավարութիւն մը, որ ընդդիմութեան կարողութիւնները բարձրացնել պիտի արտօնէ»:
Օպամա ըսաւ, որ ինք պատրաստ է լսելու քոնկրեսականներուն մտահոգութիւնները եւ վստահ է, որ այդ մտահոգութիւնները կարելի է փարատել: «Քոնկրեսին պիտի չդիմէի, եթէ խորհրդակցութեան վերաբերեալ լուրջ չըլլայի եւ չհաւատայի, որ առաքելութեան աւարտը երաշխաւորելու համար լիազօրութիւնը ճշդելով մենք աւելի ազդու պիտի ըլլանք», ընդգծեց Օպամա:
Հանդիպումին ներկայ էին Ներկայացուցիչներու տան հանրապետական նախագահ Ճոն Պայնըր, Ներկայացուցիչներու տան դեմոկրատական փոքրամասնութեան ղեկավար Նենսի Փելոսի, Ծերակոյտին մէջ հանրապետականներու ղեկավար Մինչ ՄքՔանըլ, ինչպէս նաեւ ազգային ապահովութեան եւ զինեալ ուժերու հարցերով քոնկրեսական յանձնախումբերու նախագահները:
«Մենք լսումներ եւ անմիջական քուէարկում մը պիտի պահանջենք», ըսաւ Օպամա` աւելցնելով, որ «մեծապէս կը գնահատեմ, որ ամէն մարդ արդէն սկսած է լսումներ ճշդել եւ կը մտադրէ քուէարկել անմիջապէս, որ Քոնկրեսը յառաջիկայ շաբթուան սկիզբը (արձակուրդէն) վերադառնայ»:
Կը նախատեսուի, որ Քոնկրեսը 9 սեպտեմբերին այս հարցով քուէարկութիւն կատարէ:
Ներկայացուցիչներու տան հանրապետական նախագահ Ճոն Պայնըր զօրակցութիւն յայտնեց Օպամայի պահանջին եւ յայտարարեց, որ «Սուրիոյ մէջ քիմիական զէնքի օգտագործման պիտի հակադարձենք»` աւելցնելով, որ «միայն Միացեալ Նահանգները կրնան Ասատը զսպել»:
Ներկայացուցիչներու տան դեմոկրատական փոքրամասնութեան ղեկավար Նենսի Փելոսի իր կարգին յայտնեց, որ «Ասատ քիմիական զէնք օգտագործելով կարմիր գիծը շրջանցեց»: