Në audiencën e përgjithshme, Papa kujtoi DBR-në e Rios: të rinjtë të hapin portat
drejt një bote të re, plot shpresë
Audienca e përgjithshme e paradites së sotme u hap nga Papa me një katekizëm, kushtuar
krejtësisht DBR-së së Rio-de-Zhanejros. Duke u kthyer edhe një herë në ditët e kaluara
në Brazil, Ati i Shenjtë u bëri thirrje sërish të rinjve të jenë “shpresë” për botën. Papa
Françesku e rifilloi dialogun, aty ku e kishte ndërprerë për pushimet verore, sikur
jehona e fundit e duartrokitjeve, që patën shpërthyer në bregdetin e Kopakabanës,
mbushur plot e përplot si kurrë ndonjëherë, të kishte udhëtuar ngadalë përmes oqeanit,
për të rishpërthyer një muaj më vonë, në mesin e shtyllave të Berninit, në Sheshin
e Shën Pjetrit, në Vatikan. Edhe kësaj here, dialogu i Atit të Shenjtë me të rinjtë
qe një rreze drite në një çast të errët për planetin. Papa e kujtoi Ditën Botërore
të Rinisë, duke e përshkruar si nxitje për atë shpresë, që vetëm të rinjtë mund t’ia
dhurojnë plotësisht botës së të rriturve, tepër të impenjuar të planifikojnë luftën.
Me largësinë e duhur kohore dhe kilometrike nga Rio-de-Zhanejro - që siç tha Papa,
të ndihmon ta kuptosh më mirë rëndësinë e atyre ditëve braziliane - Ati i Shenjtë
përvijoi tri pika kryesore për t’u kujtuar. E para, mikpritja: “Njerëz të mirë
këta brazilianët! Njerëz të mirë! Kanë vërtet zemër të madhe! Shtegtimi sjell gjithnjë
probleme, por mikpritja ndihmon të kapërcehen e, madje, i shndërron në raste për njohje
e miqësi. Lindin lidhje, që pastaj mbeten, sidomos në lutje. Edhe kështu rritet Kisha
në të gjithë botën, si një rrjetë miqësie të vërtetë me Jezu Krishtin, një rrjetë
që, kur të kap, të bën të lirë”. E këta brazilanë, së bashku me të rinjtë
e Ditës Botërore të Rinisë, tha Papa Françesku, dhanë edhe një dëshmi të pashlyeshme
“feste”: “Kur një qytet mbushet me djem e vajza, që ecin nëpër rrugë me flamujt
e gjithë botës, duke u përshëndetur e duke u përqafuar, kjo është festë e vërtetë.
Është sinjal për të gjithë, jo vetëm për besimtarët. E pastaj, është festa më e madhe,
festa e fesë, kur së bashku lëvdojmë Zotin, këndojmë, dëgjojmë Fjalën e Hyjit, rrimë
në heshtje e në adhurim: e gjithë kjo përbën kulmin e Ditës Botërore të Rinisë, është
qëllimi i vërtetë i këtij shtegtimi, që përjetohet veçanërisht në Mbrëmjen e madhe
të lutjes, të shtunën, e në Meshën përfundimtare”. Më pas, siç ndodh shpesh,
energjia e Papës Françesku u kthye në rrymë entuziazmi, që ndezi zemrat e atyre, që
po dëgjonin në Sheshin e Shën Pjetrit. Të rinjtë e pranishëm qenë të parët, që reaguan
ndaj ftesës së Atit të Shenjtë, kur u ndal në elementin e tretë për të kujtuar nga
DBR-ja e Rios: “misioni”. Ju, iu drejtua Papa të rinjve duke kryqëzuar vështrimin
me ta, nuk përbëni lajm, sepse sillni Krishtin e ngjallur në shoqëri e jo shkandullet,
vëllazërimin e jo dhunën. Por edhe një djalë, ose një vajzë, që për sytë e botës vlen
pak e asgjë, mund të luajë një rol jashtëzakonisht të rëndësishëm për të ardhmen e
kësaj bote, e cila s’pyet për të. Prandaj, tha Papa Bergolio, të rinjtë duhet të marrin
përsipër përgjegjësitë e tyre: “Të gjithë të rinjve, dua t’u kërkoj me forcë…
por s’e di nëse sot në shesh ka të rinj: a ka të rinj në shesh? A ka ndonjë? Dua t’ju
kërkoj të gjithëve me forcë: a doni të jenë shpresë për Zotin? A doni ju të jeni shpresë?
(Të rinjtë: “Po!”) Doni të jeni shpresë për Kishën? (Të
rinjtë: “Po!”) Një zemër e re, që e pranon dashurinë e Krishtit, shndërrohet
në shpresë për të tjerët, në forcë pa fund! Por ju, djem e vajza, të gjithë të rinjtë,
ju duhet të na shndërroni në shpresë, të shndërroheni në shpresë! Të hapni portat
drejt një bote të re shprese. Kjo është detyra juaj. A doni të jeni shpresë për të
gjithë ne? (Të rinjtë: “Po!”). Një ftesë të ngjashme
– kësaj radhe, për të dalë nga rrethi personal e për të dëgjuar me dashuri çdo njeri
– Papa ua drejtoi grupeve të ndryshme të shtegtarëve, të pranishëm në Sheshin e Shën
Pjetrit. Dashuria e Zotit, tha Ati i Shenjtë, duhet pranuar e duhet ndarë me të tjerët,
sepse vetëm kështu i bëhet mirë njeriut: “Sidomos, këtë dashuri, që e ndryshon
jetën, duhet ta bashkëndajmë me më të brishtët e më nevojtarët. Dashuria e Zotit e
ndryshon jetën! Na ndryshon të gjithëve, na bën më të mirë, më të lumtur… Mos harroni
se secili prej jush, duke përhapur dashurinë hyjnore, kontribuon në ndërtimin e një
bote më të drejtë e më solidare”.