Ռուսիոյ Վարչապետ Տմիթրի Մետվետեւ Սուրիան
Հարուածելու Որոշումը Չորդեգրելու Կոչ Ուղղեց Ամերիկեան Քոնկրէսին
Ռուսիոյ արտաքին գործոց նախարար Սերկէյ Լաւրով յայտնեց, որ շրջանի երկիրները ահաբեկչութենէն
կը տառապին եւ իբրեւ փաստ նշեց Սուրիոյ, Լիպիոյ եւ Իրաքի իրադարձութիւնները:Ան շեշտեց, որ Սուրիան հարուածելը «Ժընեւ-2» միջազգային խորհրդաժողովի գումարումը պիտի յետաձգէ եւ տագնապի լուծման հոլովոյթը պիտի արգելակէ:
«ՄԱԿ-ի Ապահովութեան խորհուրդի որոշումներն ու ՄԱԿ-ի ուխտը պիտի պաշտպանենք», ըսաւ Լաւրով` աւելցնելով, որ «մենք շրջանին մէջ շինիչ քաոս ստեղծելով Ապահովութեան խորհուրդի որոշումները հարուածելուն դէմ ենք»:
Ան կոչ ուղղեց ՄԱԿ-ի Ապահովութեան խորհուրդը վերակազմաւորելու` անոր միացնելով ափրիկեան եւ լատինամերիկեան երկիրներ:
Լաւրով ըսաւ, որ Արեւմուտքը Միջին Արեւելքի մէջ երկակի չափանիշեր կ՛օգտագործէ` աւելցնելով, որ «Արեւմուտքը կը ջանայ տապալել ոչ բարեկամ վարչակարգերը, իսկ իրեն բարեկամ բռնատիրական վարչակարգերու փոփոխութեան մասին չի խօսիր»:
«Քիմիական զէնքի օգտագործման համար սուրիական վարչակարգին ուղղուած արեւմտեան ամբաստանութիւնները բացարձակապէս համոզիչ չեն», ըսաւ ան:
Ռուսիոյ արտաքին գործոց նախարարութեան մէջ մարդկային իրաւանց թղթածրարի պատասխանատու Քոսթանթին Լուլկով յայտնեց, որ արեւմտեան շարք մը մայրաքաղաքներ, նախ եւ առաջ Ուաշինկթըն, Սուրիան հարուածելու իրենց պատրաստակամութեան համար յայտարարութիւններ կը կատարեն եւ իրենց ծրագիրները կ՛արդարացնեն քաղաքայինները պաշտպանելու անհրաժեշտութեամբ` հիմնուելով սուրիական կառավարութեան կողմէ քիմիական զէնքի քաղաքայիններու դէմ օգտագործման վարկածներուն վրայ:
Ան յիշեցուց, որ ուժի կամայական օգտագործումը նախկին Եուկոսլաւիոյ, Իրաքի եւ Լիպիոյ մէջ ինչպիսի՛ աղէտալի դէպքերու առաջնորդեց եւ շեշտեց, որ Աֆղանիստանը այդ «քաղաքայինները պաշտպանելու» քայլին առօրեայ օրինակներ կու տայ, ուր ամերիկեան առանց օդաչուի թռչող սարքերու հարուածները հարիւրաւոր քաղաքային զոհեր կը պատճառեն:
Տուման յայտարարեց, որ Քոնկրեսի հետ Սուրիոյ շուրջ հաւասարակշռուած կեցուածքի մը հասնելու համար երկխօսութեան պիտի սկսի եւ Ռուսիոյ նախագահ Վլատիմիր Փութին զօրակցած է ռուսական խորհրդարանի այդ նախաձեռնութեան:
Ռուսիոյ վարչապետ Տմիթրի Մետվետեւ ամերիկեան Քոնկրեսին կոչ ուղղեց Սուրիան հարուածելու որոշումը չորդեգրելու:
| All the contents on this site are copyrighted ©. |