Զմմառու Պատրիարքական Միաբանութեան Մեծաւոր՝ Հ. Գաբրիէլ Թ.Ծ.Վ. Մուրատեանի Պաշտօնական
Այցելութիւնը Հայաստան
Զմմառու Պատրիարքական Միաբանութեան դիւանը այսու գրով կը յայտնէ թէ, Ուրբաթ 30 Օգոստոս
2013-ին, Զմմառու Պատրիարքական Միաբանութեան Մեծաւոր Հ. Գաբրիէլ Թ.Ծ.Վ. Մուրատեան, պաշտօնական
այցելութեամբ մը Հայաստան մեկնեցաւ: Գերապայծառ Հայրը, իր այցելութեան ընթացքին, հանդիպում
ունեցաւ Հայաստանի Հանրապետութեան Վարչապետ՝ Տիար Տիգրան Սարգսեանի և այլ պետական անձնաւորութիւններու
հետ: Մեծաւոր Հօր կ'ընկերանային Միաբանութեանս երիցագոյն անդամներէն՝ Հ. Անդրանիկ Ծ.Վ.
Կռանեան և Հայաստանի Հայ կաթողիկէ համայնքի Առաջնորդ՝ Գերպծ. Ռափայէլ Արք. Մինասեան:
Պաշտօնական այս հանդիպումին ընթացքին, քննարկուեցան Հայ ժողովուրդի զաւակները յուզող
հարցեր. Միջին Արեւելքի տագնապը և անոր ազդեցութիւնը շրջանի Հայ ժողովուրդի զաւակներուն
վրայ. ինչպէս նաեւ Զմմառու Պատրիարքական Միաբանութեան գրանցման յոյժ կարեւոր գործընթացը:
Մտերմիկ զրոյցէ ետք Պրն. Տիգրան Սարգսեանը խոստացաւ իր կարելին ընել այս ուղղութեամբ: Այս
առթիւ, Մեծաւոր Հայրը այցելեց նաեւ Սփիւռքի Նախարարութիւն. ուր հանդիպում ունեցաւ Ազնուափայլ
Տիկ. Հրանուշ Յակոբեանի հետ: Քննարկման նիւթ եղաւ Երեւանի Մաշտոցեան Մատենադարանի և Զմմառու
վանքի միջեւ գոյացած Համաձայնագրին ձեռքբերումները: Մեծաւոր Հայրը իր խորին շնորհակալութիւնը
յայտնեց հայրենի իշխանութեան ցուցաբերած հոգատարութեան, ինչ կը վերաբերի ազգապահպանման
և հոգեւոր – մշակութային այնքան կարեւոր հարցերու նկատմամբ: Զմմառու վանքիս Մեծաւոր
Հ. Գաբրիէլ Թ.Ծ.Վ. Մուրատեան այցելեց նաեւ Երեւանի Մաշտոցեան Մատենադարանը, ուր տեսակցեցաւ
Մատենադարանի Տնօրէն՝ Տիար Հռաչեայ Թամրազեանին և Գլխաւոր Աւանդապահ՝ Պրն. Գէորգ Տէր
Վարդանեանի հետ, որոնց հետ քննարկութեան նիւթ եղաւ Մաշտոցեան Մատենադարանի և Զմմառու
վանքի փոխ յարաբերութիւնը և այս ուղղութեամբ կատարուած աշխատանքները: Մեծաւոր Հայրը
անգամ մը եւս իր խորին գոհունակութիւնը յայտնեց Մաշտոցեան Մատենադարանի կողմէ ցարդ իրագործուած
աշխատանքներուն համար ինչ կը վերաբերի Զմմառու Մատենադարանի Ձեռագիրներու ցուցակագրման: