Գարեգին Բ Ամենայն Հայոց Կաթողիկոսի խօսքը «Կրօնի Ազատութիւնը Արդի Աշխարհում. Մարտահրաւերներ
ու Երաշխիքներ» Խորագրով Համաժողովի Մասնակիցներին
Գոհունակութեամբ ողջունում եւ ձեզ ենք յղում Հայրապետական Մեր օրհնութիւնը Հայաստանի
Հանրապետութեան քաղաքամայր Երեւանում: Մեծապես գնահատելի է Մեզ համար կրօնական ազատութեանն
ու դրա մարտահրաւերներին նուիրուած այս համաժողովի անցկացումը քրիստոնեական հինաւուրց
մի երկրում, որի ամեն անկիւն ու քար պատուած է մարդկային արժեքների եւ ազատութեան համար
մղուած պայքարի վկայութեամբ: Այսօր այստեղ հաւաքուած հոգեւոր այրերի, քաղաքագետների,
դիւանագետների եւ լրագրողների պատկառելի ներկայութիւնը խօսում է արծարծուող թեմայի կարեւորութեան
ու արդիականութեան մասին: Մեզ համար ողջունելի է նաեւ Եւրոպայի խորհրդի նախարարների խորհրդի
կոմիտեում Հայաստանի նախագահութեան շրջանակներում համաժողովի` Հայաստանում անցկացման
նախաձեռնութիւնը: Այն մեծապես պիտի նպաստի Հայաստանի եւ հայ մշակութային ինքնութեան ներգրաւուածութեանը`
Եւրախորհրդի կողմից 2008 թուականին ընդունուած «Միջմշակութային երկխօսութեան Սպիտակ
գրքի» մշակմանն ու զարգացմանը, որի արդիականութիւնն այսօր էլ զգալի է աշխարհում: «Ապրել
միասին, արժանապատուորեն` իբրեւ հաւասար մարդիկե. այսպես է բացւում Եւրախորհրդի կողմից
մշակուած ու ներկայացուած «Սպիտակ գիրքը», որը նոր հորիզոններ է բացում միջմշակութային
եւ միջկրօնական երկխօսութեան ասպարեզում: Ժամանակակից աշխարհում յաճախ են աղաւաղւում
հաւասարութեան ու ազատութեան չափանիշները` դրանով իսկ վտանգելով միջմշակութային երկխօսութեան
իրական արժեքն ու կրօնական ազատութեան ճիշտ ընկալումը, որի հիմնական նպատակն է նպաստել
հանդուրժողականութեանը, աշխարհում խաղաղութեանը, կայունութեանն ու բարօրութեանը: Անկեղծ
հոգով ու մօտեցումով ծնուող երկխօսութեան մեջ է, որ մշակութային եւ կրօնական ինքնութեան
հաւասար դրսեւորումն ուղիղ համեմատական է մերձաւորին սիրոյ ու հանդուրժողականութեան մեջ
տեսնելու ցանկութեանը. «Եղբարք, միայն զի ազատութիւնն ձեր ոչ լինիցի ի պատճառս մարմնոյ,
այլ սիրով ծառայեցէք միմեանց», -բացատրում է Սուրբ Պօղոս առաքեալը (Գաղ. Է 13): Զարգացման
նոր փուլ թեւակոխած Եւրոպական քաղաքակրթութիւնն պետք է շարունակի յարգել հնագոյն քրիստոնեական
արմատներ ունեցօղ ժողովուրդների մշակութային իւրայատկութիւնները` բազմազանութիւնը դիտելով
որպես համաեվրոպական հարստութիւն: Հայ ժողովուրդն ու Հայաստանեայց Եկեղեցին դարեր
շարունակ մաքառել են՝ պահպանելու իրենց ուրոյն հոգեւոր-մշակութային ժառանգութիւնը, ունեն
կրօնական բազմազանութիւնն ու հանդուրժողականութիւնը յարգելու հարուստ եւ պատմական փորձառութիւն:
Ցեղասպանութիւն վերապրած Հայ ժողովուրդը իր բազմադարեան պատմութեան ընթացքում միշտ առաջնորդվել
է քրիստոնեական մատենագրութեան մեջ հրաշալիորեն ձեւակերպուած «միութիւն ի կարեւորս, ազատութիւն
յերկբայականս» բանաձեւով: Մեզանում նաեւ կարեւորվել է հոգեւոր արժեքների պահպանութեան
եւ մարդկային կեանքում դրանց ամրապնդման համար քոյր Եկեղեցիների եւ այլ կրօնների ներկայացուցիչների
հետ միասնաբար հանդես գալու հրամայականը, յարգվել են հարեւան ժողովուրդների մշակութային-հոգեւոր
իւրայատկութիւններն ու ազատութիւնները: Հայոց Եկեղեցու համար հասարակաց է եղել մարդկութեան
ընդհանուր թշնամու` մեղքի դեմ պայքարը, երբ հասարակութեան մեջ գերիշխել է կրօնական անհանդուրժողականութիւնը,
մշակութային-կրօնական թշնամանքը, մարդ անհատի իրաւունքների ոտնահարումն ու բռնացումը,
հանրային կեանքի բարօր ու աստուածահաճոյ ընթացքի խաթարումը: Աւելորդ չենք համարում այստեղ
մեջբերելու մեր Եկեղեցու կարկառուն մտածողներից մեկի` Ս. Ներսես Լամբրոնացու միտքն այս
մասին` ձեւակերպուած դեռեւս ԺԲ դարի Կիլիկեան Հայաստանի բազմամշակութային-բազմազգ հասարակութեան
պայմաններում. «Մարտ մեր հասարակաց` լիցի առ հասարակաց մեր թշնամին սատանայ, իսկ առ եղբարս`
հանդարտ ուսաք լինել հանապազ» (Ատենաբանութիւն, էջ 122): Հայոց Եկեղեցին այսօր էլ
շարունակում է ընթանալ այս ոսկե կանոնի գծած ճանապարհով` մշտապես իր առաքելութիւնն իրականացնելով
ի խնդիր հասարակաց բարօրութեան ու մարդկային աստուածատուր կերպարի պահպանման: Հայ ժողովրդի
կեանքում խաղացած իր բացառիկ դերով Հայոց Եկեղեցին այսօր էլ պետք է մնայ «կենդանի Աստծոյ
եկեղեցին, ճշմարտութեան հաստատութիւնն ու սիւնը» (Ա Տիմ. Գ 14): Հասարակական կեանքում
Հայ Եկեղեցին իբր նուիրապետութիւն ու կառոյց երբեք միայնակ չի գործել: Հայ հասարակութիւնն
իր դարերի պատմութեան ընթացքին շնորհներ ու աստուածատուր պարգեւներ է կուտակել Հայոց
եկեղեցում` մարդկային հոգեւոր կատարելութեան ու խիզախութեան հիացմունքի արժանի գործեր,
հայ ժողովրդին անմնացորդ ծառայած սրբերի ու հայրապետների լուսաւոր կերպարներ, որոնք այսօր
եկեղեցին Աստծոյ խօսքի քարոզչութեամբ ու իր առաքելութեան իրականացմամբ պարզապես վերադարձնում
է հայ ժողովրդին: Հասարակութիւնն այսօր Հայաստանում պիտի կարողանայ ի պետս վեհագոյն նպատակների
օգտագործել ազգային-եկեղեցական աւանդութիւնից մեզ բաշխուող այս շնորհները, ճիշտ գնահատել
ու հասկանալ քրիստոնեական անանց արժեքների վրայ կառուցուած Հայոց հոգեւոր հայրենիքի տարածական
ու բովանդակային կարեւորութիւնը մերօրեայ կրօնական ազատութեան փորձառութեան կերտման գործում: Արդի
կրօնական ազատութիւնը խարսխաւած է նաեւ միջկրօնական եւ միջեկեղեցական համագործակցութեան
վրայ, որին Հայ Եկեղեցին մեծապես ընդգրկուած է ամենաբարձր մակարդակով: Մենք սերտ յարաբերութիւններ
ունենք այլ յարանուանութիւնների հետ՝ ինչպես Հայաստանում, այնպես էլ արտերկրում: Էկումենիկ
յարաբերութիւնների զարգացումն Ուղղափառ, Կաթոլիկ, մի շարք բողոքական եկեղեցիների հետ
դրա վառ ապացոյցն են: Մեր ցանկութիւնն է, որ կրօնական ազատութեան, միջմշակութային
երկխօսութեան եւ հանդուրժողականութեան վեհ գաղափարներով մեկնարկող այս համաժողովը դառնայ
եւս մեկ պատեհ առիթ` հասարակաց մեր ջանքերը հանուր մարդկութեան բարօրութեանն ու խաղաղութեանն
ուղղելու համար: Հայրապետական մեր պատգամն ու մաղթանքն է ձեզ` համաժողովի յարգելի մասնակիցներ,
ջանաք ու եռանդ չխնայել` նպաստելու եւ միասնական ուժերով ստեղծելու այն լուսաւոր հասարակութիւնը,
որտեղ ամենքս կարող ենք ապրել արժանապատուորեն` իբրեւ «հաւասար մարդկային էակներ»: Բարի
ընթացք Ձեր աշխատանքներին: