Home Archivio
2013-09-02 17:08:53
സമാധാനത്തിനുവേണ്ടി പ്രാര്ത്ഥിക്കാം
02 സെപ്തംബര് 2013, വത്തിക്കാന്
സമാധാനത്തിനുവേണ്ടി പ്രാര്ത്ഥിക്കാന് മാര്പാപ്പയുടെ ട്വിറ്റര് സന്ദേശം. സെപ്തംബര് 2നാണ് ഫ്രാന്സിസ് മാര്പാപ്പ ഈ അഭ്യര്ത്ഥന @pontifex എന്ന ഔദ്യോഗിക ഹാന്ഡിലില് കണ്ണിചേര്ത്തത്. “സമാധാനത്തിനുവേണ്ടി നമുക്കു പ്രാര്ത്ഥിക്കാം, ലോകത്തിലും നമ്മുടെ ഹൃദയത്തിലും സമാധാനം ഉണ്ടാകുന്നതിനുവേണ്ടി പ്രാര്ത്ഥിക്കാം”.
ഞായറാഴ്ച ത്രികാല പ്രാര്ത്ഥനാ വേളയിലും ലോകസമാധാനത്തിനുവേണ്ടി, വിശിഷ്യ സിറിയയിലും മധ്യപൂര്വ്വദേശത്തും സമാധാനം സ്ഥാപിക്കപ്പെടുന്നതിനുവേണ്ടി പ്രാര്ത്ഥിക്കാന് മാര്പാപ്പ അഭ്യര്ത്ഥിച്ചിരുന്നു.
സെപ്തംബര് 7ന് സിറിയയ്ക്കുവേണ്ടിയുള്ള ഉപവാസ പ്രാര്ത്ഥനാ ദിനമായി ആചരിക്കാന് മാര്പാപ്പ കത്തോലിക്കാസഭാംഗങ്ങളോട് ആവശ്യപ്പെട്ടു. 7ാം തിയതി ശനിയാഴ്ച വൈകീട്ട് 7 മണിമുതല് 12 മണിവരെ വിശുദ്ധ പത്രോസിന്റെ ചത്വരത്തില് പ്രത്യേക ജാഗരപ്രാര്ത്ഥന നടത്തുമെന്നും തദവസരത്തില് മാര്പാപ്പ പ്രഖ്യാപിച്ചു. ഈ പ്രാര്ത്ഥനയില് തങ്ങളാല് സാധിക്കുന്ന രീതിയില് പങ്കുചേരുന്നതിനായി അകത്തോലിക്കരേയും അക്രൈസ്തവരേയും സന്മനസ്സുള്ള മറ്റെല്ലാവരേയും മാര്പാപ്പ ക്ഷണിച്ചിട്ടുണ്ട്.
വാര്ത്താ സ്രോതസ്സ്: വത്തിക്കാന് റേഡിയോ
All the contents on this site are copyrighted ©.