Papa Françesku takohet me anëtarë të Kongresit Botëror të Judenjve: impenjim i përbashkët
për dialogun e për paqen
“Krerët e botës duhet të bëjnë gjithçka për të shmangur luftën”: kështu tha Papa Françesku
gjatë takimit të paradites me një delegacion të Kongresit Botëror të Judenjve, kryesuar
nga Ronald S. Lauder. Në komunikatën e organizatës hebraike me bazë në SHBA-të nënvizohet
se Ati i Shenjtë e quajti të papranueshme vrasjen e njerëzve në vendin arab dhe foli
kundër antisemitizmit. Gjithashtu, gjatë takimit, të dyja palët u morën vesh për mënyrën
e kundërshtimit të sulmeve ndaj pakicave fetare, si për shembull, kundër të krishterëve
koptë në Egjipt, si edhe për impenjimin e përbashkët në favor të paqes. Presidenti
Lauder, shton nota, nënvizoi se Papa Françesku u ka dhënë një impuls të ri marrëdhënieve
ndërmjet të krishterëve e hebrenjve. Takimi i sotëm u zhvillua me rastin e festës
së Vitit të Ri 5774 për hebrenjtë e të gjithë botës. Papa uroi në hebraisht “Shana
Tova”, duke i kërkuar presidentit të Kongresit t’ua përçojë atë të gjithë hebrenjve,
kudo që ndodhen. Kongresi Botëror i Judenjve përfaqëson bashkësitë hebraike të
njëqind vendeve. I themeluar në vitin 1936, organizmi impenjohet veçanërisht në dialogun
ndërfetar, sidomos me Kishën Katolike.