Іарданія: саміт кіраўнікоў Цэркваў і хрысціянскіх супольнасцяў Блізкага Усходу
Прадстаўнік Апостальскай
Сталіцы, кардынал Жан -Луі Таран, старшыня Папскай рады па міжрэлігійным дыялогу,
прыме ўдзел у саміце кіраўнікоў Цэркваў і хрысціянскіх супольнасцяў Блізкага Усходу.
Сустрэча, якая пройдзе 3-4 верасня ў сталіцы Іарданіі, Амане, была склікана каралём
гэтай краіны Абдалой Ібн Хусэйнам. Манарх нядаўна прабываў у Ватыкане, дзе сустрэўся
з папам Францішкам. “Каралеўская сям’я Іарданіі хоча сабраць меркаванні і інфармацыі
адносна сітуацыі на Блізкім Усходзе, таму што хоча зрабіць рэальны ўклад у вырашэнне
праблемаў , якія ўплываюць на жыццё шматлікіх карэнных хрысціянскіх супольнасцей на
Блізкім Усходзе”, - сказаў у інтэрв’ю агенцтву “Fides” патрыярхальны вікарый для Іарданіі
Лацінскага Патрыярхату Іерусаліма арцыбіскуп Марун Лахам.
Акрамя ватыканскага
пурпурата ў мерапрыемстве прымуць удзел шматлікія Патрыярхі, біскупы і святары з гэтага
блізкаўсходняга рэгіёну. У цэнтры ўвагі ўдзельнікаў саміту стане, перад усім, палітычная
сітуацыя ў Егіпце, Сірыі, Ліване, Іраку, Палестыне і Іарданіі, а таксама праблемы
і выклікі хрысціян, якія жывуць у гэтым рэгіёне.