Францішак прызначыў пасланніка на ўрачыстасці ў Японіі
31 жніўня папа Францішак
прызначыў свайго спецыяльнага пасланніка на святкаванне 100-годдзя з дня заснавання
Сафійскага універсітэта ў Токіа. Ім будзе кардынал Рафаэле Фарына, архіварыус Ватыканскага
сакрэтнага архіва і кіраўнік Ватыканскай Апостальскай Бібліятэкі на пенсіі. Святкаванне
адбудзецца ў сталіцы Японіі 1 лістапада. Сафійскі універсітэт быў заснаваны езуітамі
ў 1913 г. Гэта першы каталіцкі універсітэт у Японіі. Першапачаткова ў ім дзейнічалі
факультэты немецкай літаратуры, філасофіі і камерцыі. На працягу стагоддзя універсітэт
станавіўся больш вялікім: павялічылася колькасць факультэтаў, кафедраў і студэнтаў.
На сённяшні дзень тут можна атрымаць адукацыю ў галіне тэалогіі, гуманітарных навук,
юрыспундэнцыі, эканомікі, лінгвістыкі, натуральных навук і перадагогікі. Пры універсітэце
дзейнічае шэраг навукова-даследчых устаноў: Інстытут хрысціянскай культуры і рэлігій
Усхода, Інстытут сярэдневечнай філасофіі, Інстытут Лацінскай Амерыкі, Інстытут біялагічных
навук, Міжнародны лінгвістычна-інфармацыйны інстытут, Інстытут сацыяльнай справядлівасці
і інш. Сафійскі універсітэт мае найбольшую колькасць замежных выкладчыкаў і студэнтаў
у Японіі. Сярод яго выпускнікоў пісьменнік Іноўэ Хісасі і былы прэм’ер-міністр Японіі
Хасакава Марыхіра.