Վկայութիւն Յորդանանէն. «Մեռեալ» Ծովն Ու «Ապրող» Եկեղեցին
ՀՐԱՅՐ ՃԷՊԷՃԵԱՆ Յորդանանը ունի պատմութենէն ժառանգուած մշակութային
բազմաթիւ արժէքներ, որոնք կու գան հարստացնելու երկրին քաղաքակրթութիւնը, ինչպէս նաեւ`
բնութիւնը, տեսարաններն ու տեսարժան վայրերը: Թէեւ այս տեսարաններուն մէջ կան անապատային
բաժինները, բայց նաեւ կայ ատկէ դուրս եկող գեղեցկութիւնը, որ թերեւս կրնայ նկատուիլ «չոր»
եւ «միապաղաղ», բայց խորքին մէջ ապրող վկայութիւն է: Այս վկայութիւններուն կարգին կան
նաեւ աստուածաշնչական ենթահողէ եկած իրավիճակներ, որոնք իւրաքանչիւր այցելու կը դնեն
այդ իրականութիւններու դէմ յանդիման` մէկ կողմէ գօտեպնդելով հաւատքը, միւս կողմէ` արժէքը: Մեռեալ
ծովը - Հետաքրքրական է Մեռեալ ծովը դիտել իբրեւ Յորդանանի այդ գեղեցիկ իրականութեան մէկ
անբաժանելի մասնիկը: Չէ՞ որ մահուան ու կեանքին, թէկուզ հակասական հասկացողութիւններուն
մէջ կան իրարու բախող եւ շատ անգամ նաեւ իրարու շաղկապուած իրավիճակներ, որոնք կու գան
ամբողջացնելու մարդուն եւ անոր պատմութեան հոլովոյթները: Այս իրականութենէն մեկնած`
կարելի է բացատրութիւն գտնել ծովուն «մեռեալ» կոչուելուն, երբ անոր գեղեցկութիւնը
վեր է ամէն կասկածէ: Կայ նաեւ աւելին. անիկա կը կոչուի նաեւ «Աղի ծով», իսկ աղը ուրիշ
բան չէ, եթէ ոչ` կեանքի նշան… Բայց Մեռեալ ծովուն մէջ կը հոսի նաեւ այլ կենդանի իրականութիւն
մը` Յորդանան գետը…: Յորդանան գետին առնչուած է աստուածաշնչեան եւ քրիստոնէական մշակոյթին
մէկ մեծ ու կարեւոր իրականութիւնը` հոն մկրտուեցաւ Քրիստոս… անոր հանդիպակաց տարածքին
շրջակայքը կան քրիստոնէական տարբեր համայնքներու պատկանող եկեղեցիներ եւ եկեղեցական շէնքեր,
որոնք կառուցուած են պետական արտօնութեամբ եւ հրամանագիրով` շրջանին քրիստոնէական մշակոյթի
իրականութիւնը աւելի եւս ամրապնդելով: Այդ եկեղեցիներուն շարքին է նաեւ հայկականը.
հոս կը սկսի հայուն հպարտութիւնը: Հպարտութիւն` քրիստոնէութիւնը պետականօրէն ճանչցած
առաջին ժողովուրդը ըլլալու եւ քրիստոնէական մշակոյթին մէջ` համաշխարհային եւ ներազգային,
մեծ ու գործօն անդրադարձ ունեցած ըլլալու, բայց նաեւ կայ այլ հպարտութիւն մը եւս… Չէ՞
որ Յորդանանի մէջ կայ հայկական փոքր գաղութ մը` շուրջ 3000 անհատ հաշուող, ունի մէկ փոքրիկ
հայկական նախակրթարան, երկու եկեղեցի, քանի մը մշակութային, բարեսիրական եւ մարզական
կազմակերպութիւններ… հայկական «փոքր» գաղութը գիտցած եւ կրցած է իր տեղը ունենալ քրիստոնէական
եւ պատմամշակութային արժէք ներկայացնող Յորդանան գետի ընդարձակ երկայնքին` հանդիսանալով
հայկական իրականութիւն մը` Սուրբ Կարապետ եկեղեցին' տարբեր եկեղեցիներու կողքին` Անիկա
կը հանդիսանայ «ապրող» իրականութիւն մը` «մեռեալ»-ի կողքին: Ծովուն շրջակայքին մէջ
է, բայց ունի իր վկայութիւնը` մէկ կողմէ հայուն քրիստոնէական մշակոյթի ինքնութեան Ս.
Կարապետ եկեղեցին եւ ինքնագիտակցութեան, միւս կողմէ` հայուն պատմութեան: Վկայութիւն մը,
որ հայը իր բազմաչարչար պատմութեան եւ անոր «կոտտացող» վէրքերուն մէջէն տակաւին «ապրող»
իրականութիւն է, նաեւ` այն մասին, որ հայը տակաւին կը գոյատեւէ սփիւռքի մէջ շրջանցելով
«մեռած» կամ «մեռնելու ենթակայ» ըլլալու փորձառութիւնները եւ ապրելով նոյնիսկ Մեռեալ
ծովու տարածքին: Հակառակ փոքր ըլլալուն, Յորդանանի հայկական գաղութը ունի իր շարունակուող պատմութիւնը:
«Մեռեալ» իրավիճակներու մէջէն` «ապրող» իրականութիւնը, թէ` պատմութեան ամէնէն դաժան օրերուն
իսկ հայը գիտցաւ «ապրիլ» եւ այս «ապրելու» իրականութիւնը զինք հասցուց այս օրուան: