Հայերը Կը Շարունակեն Թրքական Լրատուամիջոցներուն Մէջ Ատելութեան Արտայայտութեանց Գլխաւոր
Թիրախը Մնալ
«Հրանդ Տինք» հիմնարկը անցեալ հինգշաբթի օր հրապարակած է «Լրատուամիջոցներու մէջ ատելութեան
արտայայտութեան» մասին իր տարեկան զեկուցումը, որ ցոյց կու տայ, թէ Թուրքիոյ լրատուամիջոցներուն
ամէնէն յաճախակի երեւոյթը ատելութեան արտայայտութիւններն են եւ յօդուածագիրները կը կազմեն
յանցագործներուն մեծամասնութիւնը: Զեկուցումը կը հաղորդէ, որ այս տարուան առաջին չորս
ամսուան ընթացքին ատելութեան արտայայտութեանց ամէնէն յաճախակի թիրախները հայերը, հրեաներն
ու քրիստոնեաներն են, եւ ատելութեան համեմատութիւնն ու սրութիւնն ալ այդ շարքով կ՛ընթանայ: Թուրքիոյ
յոյն եւ քիւրտ համայնքները խտրականութեան ենթարկուած երկու միւս խմբակներն են, սակայն
անոնց դէմ եղող յօդուածներուն թիւը շատ աւելի քիչ են, քան առաջին երեքինը: Այս ժամանակահատուածին
ընթացքին նաեւ ատելութեան արտայայտութեանց դէմ գրութիւններու աճ արձանագրուած է, ինչպէս`
քիւրտերու նկատմամբ ատելութեան արտայայտութեանց դէմ, Խոջալուի ջարդերուն ոգեկոչման, Փարիզի
մէջ փետրուարին սպաննուած ՔԱԿ-ի անդամ երեք կիներու եւ Մալիի մէջ ֆրանսական զինուորական
գործողութեան պարագաներուն: